¹Chi trobul tume murhe phral, te ramosaras tumenge pal vriami ai kana kadala dieli kerdiona.

²Ke tume zhanen mishto ke o dies kai avela O Kristo, avela sar iek chor kai avel e riate.

³Kana le manush mothona, "Pacha ai nai chi iek baio," antunchi si kai strazo o nasulimos perela pe lende ai nashtina te skepinpe, avela sar le dukha kai si la zhuvlia kana si phari.

⁴Numa tume murhe phral, chi san ando tuniariko, ai kodo dies chi trobul te avel pe tumende sar iek chor.

⁵Tume shavorhe san le vediariake, ai shavorhe le dieseske. Ame chi sam la rachake, chi le tuniarikoske.

⁶Ame chi trobul te sovas sar le kolaver; numa trobul te beshas vushtiarde ai te las sama.

⁷Ke e riate sovelpe; ai vi e riate macholpa.

⁸Numa ame sam le dieseske, ai trobul te las sama. Ame trobula te avel ame o pachamos ai e dragostia sar tsalia sastrune, ai o pachamos ke sam skepime sar iek staji sastruni.

⁹Ke O Del chi alosardia ame te avel leski xoli pe amende, numa te avel ame o skepimos katar O Jesus Kristo.

¹⁰Ke O Jesus Kristo mulo amenge, saxke, ame te traiisaras vai sovas, ame traiisa lesa.

¹¹Den tume zor, ai zhutin iek kavres sar vunzhe keren.

¹²Amare phral, mangas tumendar te respektin kodolen kai keren buchi mashkar tumende, kodolen kai O Kristo thodia te ingeren tume po drom o lasho ai te sicharen tume.

¹³Sikaven lenge ke tume gindin pa lende, ai kai si tume e dragostia lenge palai buchi kai keren. Ai traiis ande pacha iek kavresa.

¹⁴Ame mangas tumendar, amare phral, te mothon kodolenge kai chi mangen te keren buchi. Pechin kodolen kai daran, ai zhutin kodolen kai si kovle ando pachamos, haliaren le ai te avel tume rhavda karing savorhende.

¹⁵Len sama te na kerel khonik nasulimos ke kerde leske nasulimos. Numa roden ande swako vriama te keren o mishtimos mashkar tumende, ai mashkar sa le manush.

¹⁶Te aven sagda pherdo raduimasa.

¹⁷Rhugin tume sa data.

¹⁸Naisin le Devleske ande soste godi. Ke so mangel O Del tumendar ande tumaro traio le Jesus Kristosa.

¹⁹Na aterdiaren e buchi le Swuntone Duxoski.

²⁰Te na avel tumenge gratsia le profesi (na asan lende kai keren e buchi le Devleski).

²¹Numa len sama swako fielo. Garaven so si lasho.

²²Ai arakhen tume katar so godi si nasulimos ai kai miazol bezex.

²³O Del kai del e pacha te kerel te aven sa leske, te garavel tume sa antrego; tumaro gindo, tumaro traio, ai tumaro stato bi doshako o dies kai avela O Jesus Kristo.

²⁴Ke kodo kai akhardia tume peste kerela kodia, ke wo kerel so mothol.

²⁵Murhe phral, rhugin tume vi amenge.

²⁶Ai chumiden sa le phralen sar phral.

²⁷Mangav ma tumendar ando anav le Kristosko, jinen kado lil sa le phralenge.

²⁸O mishtimos amaro Devlesko O Jesus Kristo te avel tumensa, Amen.