¹Mai anglal, mangav tumendar te rhugin tume but pala sa le manushenge ai te naisin leske anda sa le manush.

²Trobul te rhugisavas andal amperatsi, ai anda sa kodola kai poronchin, saxke te avel ame iek traio lasho ai trankilo, ai te traiisaras vorta angla Del.

³Ke kodia si vorta drago le Devleske amaro skepitori,

⁴ke wo mangel sa le manush te aven skepime, ai te zhanen o chachimos.

⁵Ke ferdi iek Del si, ai iek manush kai anel andek than le manushen ai le Devles, kodo manush si O Jesus Kristo.

⁶Ke wo diape te pochinel te aven savorhe skepime. Ai mangliape vriama kai sas thodini te sikavel ke O Del mangel sa le manush te aven skepime,

⁷anda kodia me o Pavlo, ek pasturi ai ek apostle tradino sim te sicharel kodolen kai Nai Zhiduvuria pa pachamos ai pa chachimos. Chi xoxavav, o chachimos phenav!

⁸Mangav vari kai le manush te rhuginpe, te vazden le vas te rhuginpe vuzhe ilesa, bi xoliariko ai bi chingarako.

⁹Ai mangav vi le zhuvlia te vuriarenpe malades, prostovanes, ai te na keren barimata penge balensa, ai te na thon pe pende but sumnakai, perli, vai tsalia kai si kuchi.

¹⁰Numa te keren lashe dieli sar zhuvlia kai mothon ke pachanpe ando Del, ai keren leski buchi.

¹¹Le zhuvlia trobul te ashunen, ai te sichon ando kalmo, ai te keren so si lenge phendo.

¹²Chi mangav e zhuvli te sicharel, vai te poronchil po mursh, numa te na phenen kanchi.

¹³Ke chaches o Adam sas kerdo o pervo, ai Eve pala leste.

¹⁴Ai o Adam nas atsado, numa e Eve sas atsadi, ai sas doshali angla Del.

¹⁵Numa e zhuvli avela skepime kana avela la glati , numa te inkerela ando pachamos, ande dragostia, ai ando vuzhimos, ai ando prostomo.