¹Naizvozvo ivai vateveri vaMwari, sevana vanodikamwa;

²uye fambai murudo, Kristu sezvaakatidawo, akazvipa nekuda kwedu, ave chipo nechibayiro kuna Mwari kuva hwema hwunonhuhwira.

³Asi upombwe netsvina yose kana kuchiva ngazvirege kutongorehwa pakati penyu, sezvinofanira vatsvene;

⁴neunzenza, nekutaura kweupenzi, kana kunemera, izvo zvisina kufanira; asi zviri nani kuvonga.

⁵Nekuti izvi munozviziva kuti hakuna mhombwe, kana munhu usina kuchena, kana munhu unochiva, unova munamati wezvifananidzo, ungava nenhaka muushe hwaKristu nehwaMwari.

⁶Ngakurege kuva nemunhu unokunyengerai nemashoko asina maturo; nekuti nemhaka yezvinhu izvi kutsamwa kwaMwari kunouya pamusoro pevanakomana vekusateerera.

⁷Naizvozvo regai kuva vagovani navo;

⁸Nekuti maimbova rima, asi zvino mava chiedza muna Ishe; fambai sevana vechiedza.

⁹Nekuti chibereko chemweya chiri mukunaka kose nekururama, nechokwadi,

¹⁰muchiidza zvinofadza kuna Ishe;

¹¹uye musadyidzana nemabasa erima asina zvibereko, asi zviri nani mumhure;

¹²Nekuti zvinhu zvinoitwa navo pakavanda zvinonyadzisa kunyange kutaura nezvazvo.

¹³Asi zvinhu zvose zvinomhurwa zvinoratidzwa nechiedza; nekuti zvose, zvinoratidzwa chiedza,

¹⁴saka unoti: Muka iwe uvete, muka kuvakafa, zvino Kristu uchakuvhenekera.

¹⁵Naizvozvo chenjerai kuti munofamba sei nekuchenjerera, kwete semapenzi asi sevakachenjera;

¹⁶muchidzikunura nguva, nekuti mazuva akaipa.

¹⁷Saka musava matununu, asi vanonzwisisa kuti kuda kwaIshe kwakadini.

¹⁸Uye regai kudhakwa newaini, makuri mune bongozozo guru, asi zadzwai neMweya;

¹⁹muchitaurirana nemapisarema nenziyo, nenziyo dzeMweya, muchiimba nekuita mutinhimira mumoyo yenyu kuna Ishe;

²⁰muchipa kuvonga nguva dzose pamusoro pezvinhu zvose kuna Mwari naBaba, muzita raIshe wedu Jesu Kristu;

²¹muchizviisa pasi umwe kune umwe mukutya Mwari.

²²Vakadzi zviisei pasi pevarume venyu, sekuna Ishe.

²³Nekuti murume musoro wemukadzi, saKristuwo ari musoro wekereke; uye ndiye Muponesi wemuviri.

²⁴Asi kunyange kereke sezvairi pasi paKristu, saizvozvowo vakadzi kuvarume vavo pachinhu chose.

²⁵Varume, idai vakadzi venyu, Kristu sezvaakadawo kereke, akazvipa nekuda kwayo;

²⁶kuti aiite tsvene ainatse nekushambidza kwemvura neshoko,

²⁷kuti aikumikidze kwaari iri kereke inobwinya isina gwapa kana kuwonyana, kana chimwe chinhu chakadai; asi kuti ive tsvene isina chaingapomerwa.

²⁸Saizvozvowo varume vanofanira kuda vakadzi vavo semiviri yavo. Unoda mukadzi wake, unozvida iye;

²⁹Nekuti hakuna munhu wakatongovenga nyama yake, asi unoifunda nekuichengetedza, saizvozvo Ishe kukereke;

³⁰Nekuti isu tiri mitezo yemuviri wake, yenyama yake neyamafupa ake.

³¹Nekuda kwaizvozvi munhu uchasiya baba namai vake, abatanidzwe kumukadzi wake; uye ava vaviri vachava nyama imwe.

³²Chakavanzika ichi chikuru, asi ndinotaura zvaKristu nekereke.

³³Asi imwiwo umwe neumwe pachake ngaade mukadzi wake sezvaanozvida iye; nemukadzi ngaatye murume.