¹Hiaite, Sinai tanga TOUPAN Mosi a houpih laia Aron leh Mosi suana mite ahi uh.

²Aron tapate min a upapen Nabad, Abihu, Elearzer, Ithamar ahi uh.

³Hiaite siampu dinga thuanilh, siampu na sem ding a hihtuam Aron tapate min ahi.

⁴Huan, Nabad leh Abihu ahih uleh Sinia gamdaia mei zat louh ding chih, TOUPA maa a latlai un TOUPA maah a si ua, ta a neikei uh: Eleazar leh Ithamarin a pa uh Aron dam laiin siampu-nasep a sem uhi.

⁵Huan, TOUPAN Mosi a houpiha,

⁶Levi chite, siampu Aron kiangah pi inla, a na a sep theihna ding un a kianga-ah omsakin.

⁷Huan amau biakbuka nasepna semin kihoupihna puanin chinah amah leh khawmpi tengteng tuam dingin na a sem ding uh.

⁸Huan, kituahkhawmna puanin van tengteng a kem ding ua, Israel suante tuama biakbuk nasep na a sem ding uh.

⁹Huan, Levite bel Aron leh a tapate kiangah na lan ding: Israel suante tuam din a kianga lat ahi uhi.

¹⁰Aron leh a tapate bel na sep dinga, a siampu hihna uh a tang nilouh ding uh: Nam dang honkigolhte hihlup ding ahi uh, chiin.

¹¹Huan, TOUPAN Mosi a houpiha,

¹²Ngaiin, Levite Israel suante lak akipan Israel suante ta chil sul hong masapen siaka keimah ngeiin ka lak ahi uh: Levite keia ahi ding ua:

¹³Tachil tengteng lah keia ahi ngal ua; Aigupta gama tachil tengteng ka hihlup niin Israelte laka tachil tengteng, a mihing a ganin ka tuam dingin ka khama ahi; keia ahi ding uh; kei TOUPA ka hi, chiin.

¹⁴Huan, TOUPAN Sinai gamdai ah Mosi a houpiha,

¹⁵Levi tate a inkuankuan un a khangkhang un sim inla: pasal peuhmah kha khat akipan tunglam an sim ding ahi, chiin.

¹⁶Huchiin Mosiin a hih dinga thupiak bangin TOUPA thu bangin a sim chiata.

¹⁷Levit tapate min Gerson, Kohath, Merari ahi uh.

¹⁸Huan, amau suangpa Gerson tapate min Libni leh Simei ahi uh.

¹⁹Amau suangpa Kohath tapate Amram, Izhar, hebron, Uziel ahi uh.

²⁰Amau suangpa Merari tapate Mali leh Musi ahi uh. Hiaite a inkuan uh bangjela Levite suante ahi uhi.

²¹Gerson bel Libnite leh Simeite suang pa ahi: hiaite Gersonte suante ahi uhi.

²²Pasal tengteng kha khat akipan tunglam a simte uh sang sagih leh ja nga tak a ching uhi.

²³Gersonte suanten a puanin uh biakbuk tumlam pangah a kai ding uhi.

²⁴Huan, Gersonte inkuana lupen Lael tapa Eliasaph ahi ding.

²⁵Gerson taten kihoupihna puanina a kep ding uh biakbuk leh puanin ahi ding, a tung khawng, kihoupihna puanina kongkhak puanjak khawng,

²⁶A intual jakte, biakbuk china a intual kongkhak puanjak khawng, maitam kima khawng, huailaia zat ding khau tengteng.

²⁷Huan, Kohath bel Amram te, Izhar te, Hebron te, Uziel te suangpa ahi: hiaite Kohath suante ahi uh.

²⁸Pasal tengteng kha khat akipan tunglam a simdan bang un sang giat leh za guk ahi un, mun siangthou kemmi ding.

²⁹Kohath tapate suanten biakbuk simlam pangah a puanin uh a kai ding uhi.

³⁰Kohathte suante inkuana lupen ding bel Uziel tapa Eliazaphan ahi ding.

³¹A kep dingte uh, bawmte, dohte, sathau khawnvak koihna, maitam, mun siangthoua nasepna tuiumbelsuan tengteng, puanjakte, huailaia nasepna thil tengteng ahi ding.

³²Huan, siampu Aron tapa Eleazar bel Levite lupen ahi dinga, mun siangthou kemmite a heu ding hi.

³³Merari bel Malite leh Musite suangpa ahi. Hiaite Merari suante ahi uh.

³⁴Pasal tengteng kha khat akipan tunglam a simdan bang un sang guk leh za nih ahi uh.

³⁵Merari suan inkuana lupen Abihail tapa Zuriel ahi: biakbuk mallam pangah a puanin uh a kai ding uhi.

³⁶Merari tapate kep dinga sehte biakbuk khuam lepkhawm bang, bang kal te, a khuamte, a kingakna khukkuakte, a vanzat tengteng, nasepna vanzat tengteng ahi uh;

³⁷A kongpi umna khuamte, a kingakna khuakkuakte, akilhbelhna leh a khaute toh.

³⁸Biakbuk suahlam pang kihoupihna puanin chin, ni suahnalam puanin kai ding bel Mosi leh Aron leh a tapa hi ding ua, mun siangthou ah Israel suante tuam dingin a kul peuhpeuh a sem ding uh. Nam ding honkigolh peuhmah hihlup ding ahi, chiin,

³⁹TOUPA thupiaka Levite a inkuankuan ua pasal tengteng kha khat akipan tunglam Mosi leh Aronin a sim teng uh sing nih leh sang nih ahi uh.

⁴⁰Huan, TOUPAN Mosi kiangah, Israel suante laka tachil, pasal kha khat akipan tunglam teng sim inla, a zah uh theiin,

⁴¹Huan, Levite bel (TOUPA ka hi) Israel suante laka tachil teng sikin non laksak ding ahi; huan, Levite gante Israel suante gan teng piang masapen sikin, a chi a,

⁴²Huan, Mosiin TOUPAN thu a piak bangin Israel suante laka tachil teng a sim,

⁴³A min uh kizom bangjelin kha khat akipan tunglam tachil pasal teng a sim uh sing nih leh sang nih leh za nih leh sawmsagih leh thum ahi uh.

⁴⁴Huan, TOUPAN Mosi a houpiha,

⁴⁵Israel suante laka tachil teng sikin Levite la inla, a gan uh sikin Levite gan; Levite keia ahi ding ua; kei TOUPA ka hi.

⁴⁶Huan, Levite sanga a tamna uh Israel suante tachil za nih leh sawmsagih leh thum tatna dingin,

⁴⁷Sekel nga chiat na la ding ahi; mun siangthoua sekel bangin na la ding hi, (sekel bel gerah sawmnih ahi):

⁴⁸Avalte tatna sum pen Aron leh a tapate na piak ding ahi, chiin,

⁴⁹Huan, Mosiin Leviten a tat ban ua a tatna sum uh a la a:

⁵⁰Israel suante tachil lak akipanin sum a la a; sum siangthou sekel bangin sang khat leh ja thum leh sawmguk leh nga a la hi:TOUPAN Mosi thu a piak, TOUPA thu bangin Mosiin tatna sum Aron leh a tapate a pia hi.

⁵¹TOUPAN Mosi thu a piak, TOUPA thu bangin Mosiin tatna sum Aron leh a tapate a pia hi.