¹Kiu amas instruon, tiu amas scion; Sed kiu malamas atentigon, tiu estas malsagxulo.

²Bonulo akiras favoron de la Eternulo; Sed homo malica estos kondamnita.

³Ne fortikigxos homo per malvirto; Sed la radiko de virtuloj ne sxanceligxos.

⁴Brava virino estas krono por sia edzo; Sed senhonora estas kiel puso en liaj ostoj.

⁵La pensoj de virtuloj estas justeco; La meditado de malvirtuloj estas malico.

⁶La paroloj de malvirtuloj estas insido pri sango; Sed la busxo de virtuloj ilin savas.

⁷La malvirtuloj renversigxos kaj malaperos; Sed la domo de virtuloj staros forte.

⁸Oni lauxdas homon laux lia sagxo; Sed perversulo estos hontigita.

⁹Pli bona estas homo negrava, sed laboranta por si, Ol homo, kiu sercxas honoron, sed al kiu mankas pano.

¹⁰Virtulo kompatas la vivon de sia bruto; Sed la koro de malvirtuloj estas kruela.

¹¹Kiu prilaboras sian teron, tiu havos sate da pano; Sed kiu sercxas vantajxojn, tiu estas malsagxulo.

¹²Malvirtulo sercxas subtenon de malnobluloj; Sed la radiko de virtuloj donas forton.

¹³Per siaj pekaj vortoj kaptigxas malbonulo; Sed virtulo eliras el mizero.

¹⁴Per la fruktoj de sia busxo homo bone satigxas; Kaj laux la merito de siaj manoj homo ricevas redonon.

¹⁵La vojo de malsagxulo estas gxusta en liaj okuloj; Sed sagxulo auxskultas konsilon.

¹⁶Malsagxulo tuj montras sian koleron; Sed sagxulo ignoras ofendon.

¹⁷Kiu estas verama, tiu eldiras tion, kio estas gxusta, Sed falsama atestulo trompon.

¹⁸Ofte nepripensita parolo vundas kiel glavo; Sed la lango de sagxuloj sanigas.

¹⁹Parolo vera restas fortike por cxiam; Sed parolo malvera nur por momento.

²⁰Malico estas en la koro de malbonintenculoj; Sed cxe la pacigantoj estas gxojo.

²¹Nenio malbona trafos virtulon; Sed la malvirtuloj havas plene da malbono.

²²Abomenajxo por la Eternulo estas busxo mensogema; Sed kiuj agas laux vero, tiuj placxas al Li.

²³Sagxa homo kasxas scion; Sed la koro de malsagxuloj elkrias malsagxecon.

²⁴La mano de diligentuloj regos; Sed mano maldiligenta pagos tributon.

²⁵Zorgo en la koro de homo gxin premas; Sed amika vorto gxin gxojigas.

²⁶Al la virtulo estas pli bone, ol al lia proksimulo; Sed la vojo de malvirtuloj ilin erarigas.

²⁷Maldiligenteco ne pretigos al si mangxon; Sed homo diligenta havas ricxecon.

²⁸Sur la vojo de virto estas vivo, Kaj gxi estos ebenigita kontraux morto.