¹imwi muri vana vaJehovha Mwari wenyu; musazvitema,kana kuzviveura pakati pameso pamusoro pavakafa.

¹Ye are the children of the LORD your God: ye shall not cut yourselves, nor make any baldness between your eyes for the dead.

²nekuti uri rudzi rutsvene kuna Jehovha Mwari wako; Jehovha wakakutsaura pakati pendudzi dzose dzavanhu vari panyika, kuti uve rudzi rwake chairwo.

²For thou art an holy people unto the LORD thy God, and the LORD hath chosen thee to be a peculiar people unto himself, above all the nations that are upon the earth.

³Usadya chinhu chipi nechipi chinonyangadza.

³Thou shalt not eat any abominable thing.

⁴Mhuka dzamungadya ndidzo: Mombe, negwai, nembudzi;

⁴These are the beasts which ye shall eat: the ox, the sheep, and the goat,

⁵nenondo, nemhara, nemhembwe, netsoma, nemharapara, nenyati, nengururu.

⁵The hart, and the roebuck, and the fallow deer, and the wild goat, and the pygarg, and the wild ox, and the chamois.

⁶Mhuka ipi neipi ina mahwanda akaparadzana, ine tsoka dzakaparadzana, inodzeya, ndidzo dzamungadya henyu.

⁶And every beast that parteth the hoof, and cleaveth the cleft into two claws, and cheweth the cud among the beasts, that ye shall eat.

⁷Asi idzi dzinodzeya, kana dzina mahwanda akaparadzana, regai kudzidya: Kamera, netsuro, nembira; nekuti dzinodzeya, asi hadzina mahwanda akaparadzana, hadzina kunaka kwamuri;

⁷Nevertheless these ye shall not eat of them that chew the cud, or of them that divide the cloven hoof; as the camel, and the hare, and the coney: for they chew the cud, but divide not the hoof; therefore they are unclean unto you.

⁸nenguruve; nekuti ina mahwanda akaparadzana, asi haidzeyi; haina kunaka kwamuri; musadya nyama yadzo, uye musabata zvitunha zvadzo.

⁸And the swine, because it divideth the hoof, yet cheweth not the cud, it is unclean unto you: ye shall not eat of their flesh, nor touch their dead carcass.

⁹Ndizvo zvamungadya kune zvose zviri mumvura: Zvose zvine zvimbi namakwande mungazvidya;

⁹These ye shall eat of all that are in the waters: all that have fins and scales shall ye eat:

¹⁰asi zvose zvisina zvimbi namakwande, musazvidya izvo, hazvina kunaka kwamuri.

¹⁰And whatsoever hath not fins and scales ye may not eat; it is unclean unto you.

¹¹Mungadya shiri dzose dzakanaka.

¹¹Of all clean birds ye shall eat.

¹²Asi dzamusingafaniri kudya ndidzo: Gora guru, negondo guru, nenyamudzura;

¹²But these are they of which ye shall not eat: the eagle, and the ossifrage, and the ospray,

¹³norukodzi, nenjerere, noruvangu namarudzi arwo;

¹³And the glede, and the kite, and the vulture after his kind,

¹⁴namarudzi ose amakunguvo;

¹⁴And every raven after his kind,

¹⁵nemhou, nezizi, neshiri yegungwa, namarudzi ose oruvangu;

¹⁵And the owl, and the night hawk, and the cuckoo, and the hawk after his kind,

¹⁶nezizi duku, nezizi guru, nejichidza,

¹⁶The little owl, and the great owl, and the swan,

¹⁷nehukurwizi, negora, nekanyurura-hove;

¹⁷And the pelican, and the gier eagle, and the cormorant,

¹⁸nezimudo, nekondo, namarudzi ayo, nemhupupu, nechiremwaremwa.

¹⁸And the stork, and the heron after her kind, and the lapwing, and the bat.

¹⁹Zvose zvina mapapiro zvinokambaira zvinofanira kuva zvisina kunaka kwamuri; hazvifaniri kudyiwa.

¹⁹And every creeping thing that flieth is unclean unto you: they shall not be eaten.

²⁰Asi shiri dzose dzakanaka mungadzidya henyu.

²⁰But of all clean fowls ye may eat.

²¹Musadya chinhu chakanora choga; ungachipa mweni uri mukati mamasuwo ako, iye achidye, kana ungachitengesa kumutorwa; nekuti iwe uri rudzi rutsvene kuna Jehovha Mwari wako. Usabika mbudzana mumukaka wamai vayo.

²¹Ye shall not eat of anything that dieth of itself: thou shalt give it unto the stranger that is in thy gates, that he may eat it; or thou mayest sell it unto an alien: for thou art an holy people unto the LORD thy God. Thou shalt not seethe a kid in his mother's milk.

²²Utsaure zvakanaka zvegumi zvezvibereko zvose zvembeu dzako, dzinobva mumunda mako gore rimwe nerimwe.

²²Thou shalt truly tithe all the increase of thy seed, that the field bringeth forth year by year.

²³Unofanira kudya pamberi paJehovha Mwari wako, panzvimbo yaachatsaura kugarisa zita rakepo, zvegumi zvezviyo zvako, nezvewaini yako, nezvamafuta ako, nezvavana vemhongora dzemombe dzako nedzamakwai ako, kuti udzidze kutya Jehovha Mwari wako nguva dzose.

²³And thou shalt eat before the LORD thy God, in the place which he shall choose to place his name there, the tithe of thy corn, of thy wine, and of thine oil, and the firstlings of thy herds and of thy flocks; that thou mayest learn to fear the LORD thy God always.

²⁴Kana nzira iri kuresa, ukasagona kuzvisvitsako, nekuti nzvimbo iyo yawakatsaurirwa naJehovha Mwari wako, kuti aise zita rakepo, iri kure newe, kana Jehovha Mwari wako akakuropafadza,

²⁴And if the way be too long for thee, so that thou art not able to carry it; or if the place be too far from thee, which the LORD thy God shall choose to set his name there, when the LORD thy God hath blessed thee:

²⁵unofanira kuzvitengesa nemari, ndokubata mari mumaoko ako, ugoenda kunzvimbo ichatsaurwa naJehovha Mwari wako,

²⁵Then shalt thou turn it into money, and bind up the money in thine hand, and shalt go unto the place which the LORD thy God shall choose:

²⁶ndokutenga nemari iyo zvose zvinodikamwa nomoyo wako, kana mombe, kana makwai, kana waini, kana zvinobata, kana zvose zvinoreva moyo wako kwauri, udyirepo pamberi paJehovha Mwari wako, ufare, iwe nemhuri yako.

²⁶And thou shalt bestow that money for whatsoever thy soul lusteth after, for oxen, or for sheep, or for wine, or for strong drink, or for whatsoever thy soul desireth: and thou shalt eat there before the LORD thy God, and thou shalt rejoice, thou, and thine household,

²⁷Uye muRevhi uri mukati mamasuwo ako, usamukangamwa, nekuti haana mugove kana nhaka newe.

²⁷And the Levite that is within thy gates; thou shalt not forsake him; for he hath no part nor inheritance with thee.

²⁸Nguva dzose kana makore matatu apera, unofanira kuuya nezvegumi zvose zvezvibereko zvako zvegore iro, ugozvichengeta mukati mamasuwo ako.

²⁸At the end of three years thou shalt bring forth all the tithe of thine increase the same year, and shalt lay it up within thy gates:

²⁹Zvino muRevhi, zvaasina mugove kana nhaka newe, nomweni, nenherera, nechirikadzi, vari mumasuwo ako, vanofanira kuuya kuzodya, vagute; kuti Jehovha Mwari wako akuropafadze pamabasa ose aunoita namaoko ako.

²⁹And the Levite, (because he hath no part nor inheritance with thee,) and the stranger, and the fatherless, and the widow, which are within thy gates, shall come, and shall eat and be satisfied; that the LORD thy God may bless thee in all the work of thine hand which thou doest.