¹Isu kwete, Jehovha, isu kwete, Asi zita renyu ngarikudzwe, Nokuda kwetsitsi dzenyu, uye nokuda kokutendeka kwenyu.

²Vahedheni vachareverei, vachiti, Ko Mwari wavo zvino uripi?

³Asi Mwari wedu ari kudenga-denga; Akaita zvose zvaakada.

⁴Zvifananidzo zvavo sirivha nendarama, Basa ramaoko avanhu.

⁵Zvinemiromo, asi hazvitauri; nameso zvinawo, asi hazvioni;

⁶Zvinenzeve, asi hazvinzwi; Nemhino zvinadzo, asi hazvinhuwhidzi;

⁷zvina maoko, asi hazvibati; Namakumbo zvinawo, asi hazvifambi; Hazvitauri napahuro pazvo.

⁸Ivo vanozviita vachafanana nazvo; Zvirokwazvo, navose vanovimba nazvo.

⁹lwe Isiraeri, vimba naJehovha; Ndiye mubatsiri wavo nenhovo yavo.

¹⁰Iwe imba yaAroni, vimba naJehovha; Ndiye mubatsiri wavo nenhovo yavo.

¹¹imwi munotya Jehovha, vimbai naJehovha; Ndiye mubatsiri wavo nenhovo yavo.

¹²Jehovha akatirangarira; iye achatiropafadza; Acharopafadza imba yaIsiraeri, Acharopafadza imba yaAroni.

¹³Acharopafadza vanotya Jehovha, Vaduku navakuru vose.

¹⁴Jehovha acharamba achikuwanzai, imwi navana venyu.

¹⁵imwi makaropafadzwa naJehovha, Iye akaita kudenga napasi.

¹⁶Kudenga-denga ndiko kudenga-denga kwaJehovha; Asi pasi akapa vanakomana vavanhu.

¹⁷Vakafa havarumbidzi Jehovha, Kunyange ani naani anoburukira kwakanyarara;

¹⁸Asi isu hedu tichakudza Jehovha Kubva panguva ino kusvika pakusingaperi. Hareruya!