¹Vongai Jehovha, nekuti akanaka; nekuti tsitsi dzake dzinogara nokusingaperi.

²Vongai Mwari wavamwari; nekuti tsitsi dzake dzinogara nokusingaperi.

³Vongai Ishe wamadzishe; nekuti tsitsi dzake dzinogara nokusingaperi.

⁴Iye oga, anoita zvishamiso zvikuru; nekuti tsitsi dzake dzinogara nokusingaperi.

⁵Iye, akaita kudenga-denga nenjere dzake; nekuti tsitsi dzake dzinogara nokusingaperi.

⁶Iye akatatamura pasi pamusoro pemvura zhinji; nekuti tsitsi dzake dzinogara nokusingaperi.

⁷Iye akaita zviedza zvikuru; nekuti tsitsi dzake dzinogara nokusingaperi.

⁸Zuva, kuti ribate ushe masikati; nekuti tsitsi dzake dzinogara nokusingaperi.

⁹Mwedzi nenyeredzi, kuti zvibate ushe usiku; nekuti tsitsi dzake dzinogara nokusingaperi.

¹⁰Iye, akarova veEgipita pamatangwe avo; nekuti tsitsi dzake dzinogara nokusingaperi.

¹¹Akabudisa Isiraeri pakati pavo; nekuti tsitsi dzake dzinogara nokusingaperi.

¹²Nechanza chine simba, uye noruoko rwakatambanudzwa; nekuti tsitsi dzake dzinogara nokusingaperi.

¹³Iye akaparadzanisa Gungwa Dzvuku napakati; nekuti tsitsi dzake dzinogara nokusingaperi.

¹⁴Akayambusa Isiraeri nomukati maro; nekuti tsitsi dzake dzinogara nokusingaperi.

¹⁵Akawisira Farao nehondo yake muGungwa Dzvuku; nekuti tsitsi dzake dzinogara nokusingaperi.

¹⁶Iye, akaperekedza vanhu vake murenje; nekuti tsitsi dzake dzinogara nokusingaperi.

¹⁷Iye, akaparadza madzimambo makuru; nekuti tsitsi dzake dzinogara nokusingaperi.

¹⁸Akauraya madzimambo akakurumbira; nekuti tsitsi dzake dzinogara nokusingaperi.

¹⁹Sihoni mambo wavaAmori; nekuti tsitsi dzake dzinogara nokusingaperi.

²⁰NaOgi mambo weBhashani; nekuti tsitsi dzake dzinogara nokusingaperi.

²¹Akapa nyika yavo ive nhaka; tsitsi dzake dzinogara nokusingaperi.

²²Ive nhaka yaIsiraeri muranda wake; nekuti tsitsi dzake dzinogara nokusingaperi.

²³Iye, akatirangarira paurombo bwedu; nekuti tsitsi dzake dzinogara nokusingaperi;

²⁴Akatirwira pavadzivisi vedu; nekuti tsitsi dzake dzinogara nokusingaperi.

²⁵Ndiye anopa zvinhu zvose zvokudya zvazvo; nekuti tsitsi dzake dzinogara nokusingaperi.

²⁶Vongai Mwari wokudenga; nekuti tsitsi dzake dzinogara nokusingaperi.