¹Ndichavonga Jehovha nomoyo wangu wose; Ndichaparidza mabasa enyu ose anoshamisa.

²Ndichafara nokukufarirai zvikuru; Ndichaimbira zita renyu nziyo dzokurumbidza, imwi Wekumusoro-soro.

³Kana vavengi vangu vachidzokera shure, Vanogumburwa nokupera pamberi penyu.

⁴Nekuti mandiruramisira mhosva yangu; Makagara pachigaro choushe muchitonga nokururama.

⁵Makatuka vahedheni, makaparadza ani nani wakaipa, Makadzima zita ravo nokusingaperi-peri.

⁶Vavengi vakapera, vakaparadzwa nokusingaperi; makaparadza maguta avo, Nechiyeudzo chawo chakaparara.

⁷Asi Jehovha agere ari mambo nokusingaperi; Akagadzira chigaro chake choushe kuti atonge.

⁸Achatonga nyika nokururama, Achatonga vanhu zvakafanira.

⁹Jehovha achava nhare yakasimba kuna vanomanikidzwa, Nhare yakasimba panguva yokutambudzika.

¹⁰Vanoziva zita renyu vachavimba nemi; nekuti imwi Jehovha hamuna kurasha vanokutsvakai.

¹¹Imbirai Jehovha nziyo dzokumurumbidza, iye agere paZiyoni; dudzirai zvaakaita pakati pendudzi dzavanhu.

¹²Kana achitsvaka ropa, anovarangarira; Haakangamwi kuchema kwavarombo.

¹³Ndinzwirei tsitsi, Jehovha; Tarirai, kumanikidzwa kwangu navanondivenga, imwi munondisimudza pamisuwo yorufu;

¹⁴Kuti ndiparidze kurumbidzwa kwenyu kose; Pamisuwo yomukunda weZiyoni, Ndichafarira kuponesa kwenyu.

¹⁵Vahedheni vakanyura mugomba ravakachera; Rutsoka rwavo rwakabatwa mumumbure, wavakavanza.

¹⁶Jehovha wakazvizivisa; akatonga; akaipa wakateyiwa nebasa ramaoko ake.

¹⁷Vakaipa vachadzokera kuSheori, Ivo vahedheni vose, vakakangamwa Mwari.

¹⁸Nekuti anoshaiwa haangakanganikwi nokusingaperi, Nokutarira komurombo hakungaperi nokusingaperi.

¹⁹Simukai Jehovha; munhu ngaarege kukunda; Vahedheni ngavatongwe pamberi penyu.

²⁰Chivatyisai, Jehovha; Vahedheni ngavazive kuti vanongova vanhu.