¹Ishe, makanga muri ugaro bwedu Pamarudzi namarudzi.

²Makomo asati azvarwa, Musati matongosika nyika nevhu, Kubva pakusingaperi kusvikira pakusingaperi imwi muri Mwari.

³Munodzosera munhu kuguruva; Muchiti, Dzokai vana vavanhu.

⁴nekuti kwamuri makore ane chiuru Akangofanana nezuva razuro kana rapfuura, Senguva yokurinda yousiku.

⁵Munovakukura semvura zhinji; vava sehope; Mangwanani vakaita souswa hunotunga.

⁶Mangwanani hunotumbuka, hunomera; Madekwana hunodzurwa, ndokusvava.

⁷nekuti tinopedzwa nokutsamwa kwenyu, Tinotambudzika nehasha dzenyu.

⁸Makaisa zvakaipa zvedu pamberi penyu, Zvivi zvedu zvakavanzika pachiedza chechiso chenyu.

⁹Nekuti mazuva edu ose anopfuura makatsamwa; Makore edu anopera sebefu.

¹⁰Mazuva amakore edu anosvika makore makumi manomwe, Kana tine simba makore makumi masere; Asi kunyange achikudzwa ndiko kutambudzika nenhamo chete. nekuti gare-gare aenda, nesu tabhururuka taenda.

¹¹Ndianiko anoziva simba rokutsamwa kwenyu, Nehasha dzenyu, kuti mutyiwe zvakafanira here?

¹²Tidzidzisei kunatsoverenga mazuva edu, Kuti tizviwanire moyo wakachenjera.

¹³Dzokai Jehovha; kusvikira rinhiko? nzwirai tsitsi varanda venyu.

¹⁴Tigutsei mangwanani netsitsi dzenyu; Kuti tifarise, tive nomufaro mazuva edu ose.

¹⁵Tifadzei zvinoenzana namazuva amakatitambudza, Namakore atakaona zvakaipa.

¹⁶Zvamakaita ngazvionekwe navaranda venyu, Nokubwinya kwenyu pamusoro pavana vavo.

¹⁷Kunaka kwaJehovha Mwari wedu ngakuve pamusoro pedu; Mutisimbisire basa ramaoko edu; Zvirokwazvo, basa ramaoko edu murisimbise.