¹Ipapo Erihu akapindura, akati,

²Inzwai mashoko angu, imwi vanhu vakachenjera; Rerekai nzeve dzenyu kwandiri, imwi mune zivo.

³Nekuti nzeve ndiyo inoidza mashoko, Sezvinoravira mukamwa zvokudya.

⁴Ngatizvitsanangurire zvakarurama; Ngatizive tose kuti zvakanaka ndezvipi.

⁵Nekuti Jobho akati, Ndakarurama, Asi Mwari akanditorera kururama kwangu;

⁶Kunyange ndakarurama hangu, ndinonzi ndine nhema; Pandakakuvadzwa hapangapori, kunyange ndisina kudarika.

⁷Ndianiko akafanana naJobho, Anomwa kushorwa semvura?

⁸Anofambidzana navanoita zvakaipa, Anofamba navanhu vakashata.

⁹Nekuti iye akati, Munhu haatongobatsirwi, Kana achifarira Mwari.

¹⁰Saka chindinzwai, imwi varume venjere, Mwari haangatongoiti zvisakarurama; waMasimbaose haangatongoiti zvakaipa.

¹¹Nekuti acharipira munhu sezvaakabata, Achapa mumwe nomumwe sezvaakafanirwa.

¹²Zvirokwazvo, Mwari haangaiti zvakaipa, waMasimbaose haangakanganisi pakutonga.

¹³Ndianiko akamuita murairi wenyika? Ndianiko akamupa nyika yose?

¹⁴Kana akadzosera moyo wake kwaari, Kana akadzosera kwaari mweya wake nokufema kwake;

¹⁵Ipapo vanhu vose vachaparara pamwechete, Munhu akadzokerazve kuguruva.

¹⁶Zvino kana mukagona kunzwisisa, inzwai shoko iri, Teererai inzwi ramashoko angu.

¹⁷Ko munhu, anovenga zvakarurama, angabata ushe here? Mungapa mhosva munhu akarurama, ane simba here?

¹⁸Ko zvakanaka kuti kuna mambo, Makashata? Kana kuvakuru, hamutyi Mwari here?

¹⁹Ndoda kumunhu asingakudzi machinda, Asingatsauri vafumi kupfuura varombo. Nekuti ivo vose ndiro basa ramaoko ake.

²⁰Vanofa kamwe-kamwe pakati pousiku; Vanhu vanozozununguswa ndokuparara havo, Vane simba vanobviswa zvingaitwa noruoko.

²¹Nekuti meso ake anotarira nzira dzomunhu, Unoona kufamba kwake kose.

²²Hapana rima kana mumvuri worufu, Pangavanda vanoita zvakaipa.

²³Nekuti haachafaniri kurangarira munhu, Kuti atongwe pamberi paMwari.

²⁴Anoparadza vanhu vane simba asinganzveri, Ndokugadza vamwe panzvimbo yavo.

²⁵Saka anocherekedza mabasa avo; Unovaparadza usiku, vakapwanyiwa.

²⁶Anovarova sezvinorohwa vanhu vakaipa Vamwe vose vachizviona pachena.

²⁷Nekuti vakatsauka pakumutevera, Vakasava nehanya nenzira dzake dzose;

²⁸Naizvozvo vakasvitsa kuchema kwavarombo kwaari, Akanzwa kuchema kwavakatambudzwa.

²⁹Kana iye akazorodza, ndianiko ungapa mhosva? Kana akavanza chiso chake, ndianiko angazomuona? Kana zvichitarirwa rudzi kana munhu mumwe, zvakafanana hazvo;

³⁰Kuti munhu asakarurama arege kubata ushe, Kuti kurege kuva nomunhu achateya vanhu.

³¹Nekuti kunomunhu here akati kuna Mwari, Ndarangwa hangu, kunyange ndisina kutadza?

³²Ndidzidzisei izvo zvandisingaoni; Kana ndichinge ndaita zvakaipa, handingazviitizve?

³³Ko iye achatsiva sezvaunoda iwe, zvaunozviramba here? Nekuti ndiwe unofanira kutsanangura, handizini; Saka chitaura zvaunoziva.

³⁴Vanhu vane njere vachati kwandiri, Uye vose vakachenjera, vanondinzwa, vachati,

³⁵Jobho anotaura zvaasingazivi, Mashoko ake haano uchenjeri.

³⁶Dai Jobho aiidzwa kusvikira pakupedzisira, Zvaakapindura savanhu vakaipa.

³⁷Nekuti anowedzera kumukira Mwari pazvivi zvake, Anorova namaoko ake pakati pedu, Achiwanza mashoko ake anorwa naMwari.