¹Ndudzi dzinoitireiko bope, Navanhu vanofungireiko zvisina maturo?

²Madzimambo enyika anozvigadzira, Navabati vanorangana, Kuzorwa naJehovha nomuzodziwa wake, vachiti,

³Ngatidambure zvisungo zvavo, Ngatirashe mabote avo abve kwatiri.

⁴Iye, agere kudenga-denga, achaseka; Ishe achavadadira.

⁵Ipapo achataura kwavari pakutsamwa kwake, Nokuvavhundusa pahasha dzake huru;

⁶Kunyange zvakadaro ndakagadza mambo wangu paZiyoni, iro gomo rangu dzvene.

⁷Ndichaparidza chirevo, chinoti, Jehovha akati kwandiri, Ndiwe mwanakomana wangu; Nhasi ndakubereka.

⁸Kumbira kwandiri, ndikupe ndudzi ive nhaka yako, Nemigumo yenyika zvive zvako.

⁹Muchavapwanya netsvimbo youtare; Muchavaputsanya sehari yomuumbi.

¹⁰Zvino chivai nenjere, imwi madzimambo; Munyeverwe, imwi vatongi venyika.

¹¹Shumirai Jehovha nokutya, mufare muchidedera.

¹²Tsvodai mwanakomana, arege kutsamwa, mufire panzira, nekuti hasha dzake dzingakurumidza kumuka. Vakakomborerwa vose vanovimba naye.