¹Usagodora vanhu vakaipa; Usashuva kuva pakati pavo.

²nekuti moyo yavo inorangarira kuparadza; Nemiromo yavo inotaura zvakashata.

³Imba inovakwa nouchenjeri; Inosimbiswa nenjere.

⁴Nezivo dzimba dzomukati dzinozadzwa Nefuma yose inokosha inofadza.

⁵Munhu akachenjera ane simba; Zvirokwazvo, munhu wezivo anowedzera simba

⁶nekuti anofanira kurwa pfumo amborairirwa nouchenjeri; Asi kuna varairiri vazhinji ndiko kune ruponeso.

⁷Uchenjeri hahusvikirwi nebenzi; Harishamisi muromo waro padare.

⁸Anorangarira kuita zvakaipa, Achanzi navanhu mwene wezvakashata.

⁹Mufungo woupenzi zvivi; Mudadi anonyangadza vanhu.

¹⁰Kana ukapera simba nezuva rokutambudzika, Simba rako ishoma.

¹¹Rwira vanoiswa kurufu; Novourawa usarega kuvadzosa.

¹²Kana ukati, Tarira, hatina kuzviziva; Ko iye anoidza moyo, haazvioni here? Naiye anochengeta mweya wako, haazvizivi here? Ko iye haangadzoaeri mumwe nomumwe zvakaenzana nebasa rake here?

¹³Mwanakomana wangu, idya uchi, nekuti hwakanaka; Nomusvi unozipa pamukamwa wako.

¹⁴Uchaona kuti ndizvo zvichaita uchenjeri kumweya wako; Kana wahuwana, mubayiro uchavapo, Nezvawakatarira hazvingaparadzwi.

¹⁵Iwe munhu akaipa, usavandira panogara wakarurama; Usaparadza paanozorora.

¹⁶nekuti munhu akarurama angawa kanomwe, achisimukazve; Asi vakaipa vanowisirwa pasi nenjodzi.

¹⁷Usafarisisa kana muvengi wako achiwa; Kana achiwisirwa pasi, moyo wako ngaurege kufara.

¹⁸Kuti Jehovha arege kuzviona, zvisamufadza, Akazodzora kutsamwa kwake kwaari.

¹⁹Usatsamwa nokuda kwavaiti vezvakaipa; Uye usagodora vakaipa.

²⁰nekuti munhu akaipa haana mubayiro; Mwenje wakaipa uchadzimwa.

²¹Mwanakomana wangu, itya Jehovha namambo; Usafambidzana navanongoshanduka shanduka.

²²nekuti nhamo yavo ichamuka pakarepo; Nokuguma kwamakore avo, ndiani achazviziva?

²³Zvirevo izviwo zvakabva kuna vakachenjera, Kutsaura vanhu pakutonga hazvina kunaka

²⁴Anoti kune wakaipa, Akarurama, Vanhu vachamutuka, nendudzi dzichamusema.

²⁵Asi vanomuraira, vachaitirwa zvakanaka; ropafadzo yakanaka ichauya pamusoro pavo.

²⁶Anopindura namashoko akarurama, unotsvoda nemiromo.

²⁷Gadzira basa rako kunze, Uzvigadzirire iro pamunda; Pashure ugovaka imba yako.

²⁸Usava chapupu chinopomera wokwako asina mhosva; Usanyengedzera nemiromo yako.

²⁹Usati, Sezvaakandiitira, ndizvo zvandichamuitirawo; Ndicharipira munhu sezvaakaita iye.

³⁰Ndakapfuura napamunda wesimbe, Napamunda wemizambiringa womunhu anoshaiwa njere;

³¹Tarirai, akanga angomera mhinzwa chete; Munda wose wakange wakafukidzwa norukato, Norusvingo rwawo rwamabwe rwakanga rwakoromoka.

³²Ipapo ndakacherekedza, ndikanatsofunga; Ndakaona, ndikadzidziswa.

³³Kumbovata zvishomanene, kumbotsumwaira zvishomanene, Kumbofungatira maoko zvishomanene, ndizorore;

³⁴Saizvozvo urombo hwako huchasvika segororo, Nokushaiwa kwako somunhu akashonga nhumbi dzokurwa.