¹Ndinzwirei tsitsi, Mwari nokuda kounyoro bwenyu; Dzimai kudarika kwangu nokuda kwetsitsi dzenyu zhinji.

²Ndisukei zvakaipa zvangu chose, Ndinatsei chivi changu.

³nekuti ndinoziva kudarika kwangu; Chivi changu chinogara chiri pamberi pangu.

⁴Ndakatadza kwamuri, kwamuri moga, Ndakaita chinhu chakaipa pamberi penyu; Kuti munzi makarurama pakutaura kwenyu, Muve usina mhosva pakutonga kwenyu.

⁵Tarirai, ndakaberekerwa muzvakaipa; Mai vangu vakandigamuchira muzvivi.

⁶Tarirai, munoda chokwadi pamoyo; Munoda kundidzidzisa uchenjeri mukati makavanda.

⁷Ndinatsei nehisopi, ndive akanaka, Ndishambidzei, ndichene kupfuura mazayi echando.

⁸Ndinzwisei mufaro ndive nomoyo muchena; Kuti mafupa amakavhuna afare.

⁹Vanzirai zvivi zvangu chiso chenyu, Dzimai zvakaipa zvangu zvose.

¹⁰Sikai mukati mangu moyo wakachena, Mwari; Vandudzai mukati mangu mweya wakarurama.

¹¹Regai kundirasha pamberi penyu; Musabvisa mweya wenyu mutsvene kwandiri.

¹²Dzoseraizve kwandiri mufaro wokuponesa kwenyu; Nditsigirei nomweya, unoda.

¹³Ipapo ndichadzidzisa vadariki nzira dzenyu; Uye vatadzi vachatendeukira kwamuri.

¹⁴Ndirwirei pamhosva yeropa, Mwari, imwi Mwari muponesi wangu; Ipapo rurimi rwangu ruchaimbira kururama kwenyu kwazvo.

¹⁵Ishe, zarurai miromo yangu; Ipapo muromo wangu uchaparidza kurumbidzwa kwenyu.

¹⁶nekuti imwi hamufariri zvibayiro; ndingadai ndaikupai izvo; Hamufadzwi nechipiriso chinopiswa.

¹⁷Zvibayiro zvaMwari mweya wakaputsika; moyo wakaputsika nowakapwanyika, imwi Mwari hamungaushori.

¹⁸Itirai Ziyoni zvakanaka nokuda kwenyu; Vakai masvingo eJerusaremu.

¹⁹Ipapo muchafarira zvibayiro zvakarurama, nechipiriso chinopiswa nechipiriso chinopiswa chose; Ipapo vachabayira nzombe paaritari yenyu.