¹Haiwa Jehovha, regai kuramba munyerere; Regai kuramba musingatauri, musanyarara Mwari.

²nekuti tarirai, vavengi venyu vanoita bope; Vanokuvengai vakasimudza misoro yavo.

³Vanofunga mano kuti vanyengere vanhu venyu, Vanorangana pamusoro pavakavanzwa nemi.

⁴Vakati, Uyai, tivaparadze, varege kuzova rudzi; Kuti zita raIsiraeri rirege kuzorangarirwa.

⁵Nekuti vakarangana nomoyo mumwe; Vanoita sungano kuzorwa nemi.

⁶Matende aEdhomu navaIshimaeri, Moabhu navaHagari;

⁷Gebhari, naAmoni, naAmareki; Firisitia pamwechete navagere Tire;

⁸Asiriawo wakasangana navo; Vakabatsira vana vaRoti.

⁹Muvaitire sezvamakaitira Midhiani; NaSisera, naJabhini, paRwizi Kishoni;

¹⁰Ivo vakaparadzwa paEndori; Vakava mupfudze wapasi.

¹¹Itai vakuru vavo saOrebhi naZeebhi; Zvirokwazvo machinda avo ose saZebha naZarimuna;

¹²Ivo vakati, Ngatizvitorere Ugaro hwaMwari huve bwedu.

¹³Mwari wangu, muvaite seguruva rinondeyeswa nemhepo; Samakoto anodzingwa nemhepo.

¹⁴Somoto unopisa dondo, Somurazvo womoto unopisa makomo;

¹⁵Muvateverere saizvozvo nedutu renyu remhepo, Muvavhunduse nechamupupuri chenyu.

¹⁶Fukidzai zviso zvavo nokunyadziswa; Kuti vatsvake zita renyu, Jehovha.

¹⁷Ngavanyadziswe, vavhunduswe nokusingaperi; Zvirokwazvo, ngavanyadziswe vafe;

¹⁸Vazive kuti imwi moga, imwi munezita rinonzi Jehovha, Ndimi Wekumusoro-soro kumusoro kwepasi pose.