¹Aw, TOUPA kiangah kipahthu gen unla, amin lou un; mi chih lakah a thilhihte theisak un.

²Amah pahtawiin lasa unla, amah phatin lasa un; a thillamdang hih tengteng thuin houlim un.

³A min siangthou tuh suang un: TOUPA zongte lungtang nuamsa hen.

⁴TOUPA leh a hatna zong unla: a mel zong gige un.

⁵A hihzohsa a nasep lamdangte, a thillamdangte, leh a kama vaihawmnate tuh theigige un;

⁶A sikha Abraham suante aw, a telte Jakob tate aw.

⁷Amah tuh TOUPA i Pathian ahi a; a vaihawmte leitung tengtengah a om hi.

⁸A thukhun khantawnin a thei naknak, suan sang khat tana a thu na piak ngei;

⁹Abraham kianga a thukhun leh, Isaak kianga a kichiamna ngei;

¹⁰Huaimah tuh thuseh adingin Jakob kiangah a hihkipa, Israel kiang khantawn thukhun dingin.

¹¹Kanaan gam na kiangah ka honpe dinga, na gou tantuam ding chiin.

¹²Mi tawmchik phet a hihlai un; ahi, tawmchik phet, huai gamah mikhual ahi ngal ua;

¹³Nam tuamtuam kiangah a pai vialvial ua, gam tuamtuam akipanin mi tuamtuamte kiangah.

¹⁴Kuamah nuaisiah a phal keia: ahi, amau jiakin kumpipate leng a taihilha:

¹⁵Ka thaunilhte khoih kei unla, ka jawlneite himhim leng hihna kei un, chiin.

¹⁶Huai gama ke dingin kial a sam a; nek ding himhim a omsakta kei hi.

¹⁷A ma uah mi a sawla; Joseph sikha dinga juakin a oma:

¹⁸A khete tuh kolin a hihna ua; sik khainiang bunin a omta a.

¹⁹A thu a tun masiah, TOUPA thuin amah tuh a zeet ngitnget hi.

²⁰Kumpipan mi a sawl khiaa, a suta, a khahta a, mi chih vaihawmpa ngeiin.

²¹A innsunga heutu ding leh, a sum tengteng tunga vaihawm dingin a bawla:

²²A mi liante a ututa hen ding leh; a upate hihpil dingin.

²³Israel leng Aigupta gamah a hoha; Jakob tuh Ham gamah a omta dih hi.

²⁴A mite tuh nakpi takin a pungsaka, amau doute sangin a hihhat zota hi.

²⁵A mite ho dingin a lungtang uh a lehngatsaka, a sikhate tunga lepchiah taka hih dingin.

²⁶A sikha Mosi a sawla, a mitel Aron toh.

²⁷Amau achiamnate a lak uah a ensak ua, Ham gamah thillamdangte a ensak uhi.

²⁸Aman mial a sawla, a hihmialta a; huchiin a thute tuh a nialta kei uhi.

²⁹A tuite uh sisan a suaksaka, a ngasate uh a hihlumta hi.

³⁰A gam uh ukengin a dimta a, a kumpipate uh dantan sungah nangawn leng.

³¹Aman thu a gena, huchiin thou tampi hongpai ua, hik leng a gamsung tengteng uah a hongom uhi.

³²A kiang uah vuah sikin gial a pia a, a gam uah meikuang jualjual leng a peta hi.

³³A grep guite u leh a theipi kungte uh a hihsi a; a gam ua singte leng a kitansakta hi.

³⁴Aman thu a gena, huchiin khaupeta a hongpai ua, lungte toh, sim zoh vuallouhin.

³⁵Huaiten a gam ua haichi khempeuh a gai ua, a lei gahte uleng a gai uhi.

³⁶A gam ua ta masa om tengteng a thata, a hatna tengteng gah masapente uh.

³⁷Huchiin, dangka leh dangkaeng toh a pi kheta a; amah namte lakah mi hatlou khat leng a om kei hi.

³⁸A pawt lai un Aiguptate a kipak ua: amau tuh a lau tak jiak un.

³⁹Aman aliah dingin mei a kaisaka, jana tanvak dingin mei leng a pia hi.

⁴⁰A ngen ua, huchiin vamin a honpia a, van an-in amau a taisakta hi,

⁴¹Suangpi a honga, huchiin tui a hongpawt juajua a, mun keute ah lui bangmaiin a luangta hi.

⁴²A thu siangthou a theigige ngala, a sikha Abraham toh.

⁴³Huchiin, a mite tuh nuamsa takin a pi kheta a, a mitelte tuh lasa kawmkawm jelin.

⁴⁴Huan, nam chih gamte a kiang uah a piaksaka: amau tuh mi chih sepkhiaksa a luahta uhi.A thusehte a zuih theihna ding un, a dante tuh a vom hoihna dingin, TOUPA phat un.

⁴⁵A thusehte a zuih theihna ding un, a dante tuh a vom hoihna dingin, TOUPA phat un.