¹Toupa aw, nangmah ah ka ginna ka koih jel hi; chikmah chiangin zahlakin honomsak ken.

²Na diktatna vangin honhumbitin, honhonkhia inla: kei lamah na bil hondohin, honhondam in.

³Kei dingin omna suangpi, ka hohtheih gigena ding, hong hiin: nang honhondam dingin thu na pia a; ka suangpi leh ka kulhpi na hi ngala.

⁴Ka Pathian aw, mi gilou- salou khut akipan honhonkhia in, mi diktatlou leh nunsia khut akipan.

⁵Toupa Pathian aw, nang ka lamet na hi ngala: ka naupan chik akipan ka hon muan na hi hi.

⁶Ka nu gil akipan him in nangmah kaihin ka om jela: ka nu sung akipan honlakhepa na hi: nangmah ahi, ka honphat gige ding.

⁷Mitampi theihin thillamdang kahi a; himahleh nang ka kihumbitna kiptak na hi.

⁸Ka kam nang phatna in a dim ding, nitumin na pahtawinain a dim ding hi.

⁹Ka tek chiangin honpaikhe kenla, ka tha a jawt chiangin hon paisan ken.

¹⁰Ka melmaten ka tungtangthu a gen ngal ua; ka hinna tangte leng a kikou uhi.

¹¹Pathianin a paisanta: delh unla, man un; humbitpa ding himhim a om ngal keia chiin.

¹²Pathian aw, hon gamlat mahmah ken: ka Pathian aw, honpanpih dingin kin in.

¹³Ka hinna tunga melmate zahlak leh mangthangin om uhenla; ka siatna ding zongte gensiatna leh zumnaa khuhin om uhen.

¹⁴Himahleh ken jaw ka lamen gige dinga, ka honphat semsem ding hi.

¹⁵Ka kamin na diktatna thu a gen ding a, nitumin ka hotdamna thu a gen dinga: a tamdan ka thei ngal keia.

¹⁶Toupa Pathian thilhih thupiakte toh ka hongpai ding a: a diktatna, nangmah diktatna thu kia, ka gen ding hi.

¹⁷Pathian aw, ka naupan chik akipan nang non hilha; tu tanin na thillamdang hihte ka theisak gige hi.

¹⁸A hi, Pathian aw, ka teka ka sam a kan hun inleng hon paisan mahmah ken; na hatna tuh khangthak nawnte kiangah leh, na thilhihtheihna hongom lai dingte kianga ka theihsak mateng.

¹⁹Pathian aw, na diktatna leng a sang mahmah ahi; Pathian aw, nang thil thupitakte hihpa, nangmah bang kua a om?

²⁰Nang, buaina tampi leh thupitak honmusakpan non hingsak nawn dinga, lei thukpi akipan non pi khe nawn ding hi.

²¹Nang ka thupina honhihkhangsak inla, hongkihei nawn inla, hon khamuan in.

²²Pekgingin leng ka hon phat dinga, ka Pathian aw, na thutak ngei ka phat ding. Nang Israelte Mi Siangthou aw, kaihging toh nangmah phatin la ka sa ding hi.

²³Nangmah phata la ka sak chiangin ka muk a nuam mahmah dinga; ka hinna na tat mah leng a nuam mahmah ding hi.Ka leiin leng nitumin na diktatna thu a gen ding; ka siatna ding zongte a zahlak un a zumta ngal ua.

²⁴Ka leiin leng nitumin na diktatna thu a gen ding; ka siatna ding zongte a zahlak un a zumta ngal ua.