¹Chihtaktakin dangka adingin khuk a oma, huan a hihsiang uh dangkaeng adingin mun.

²Lei akipanin sik a kilakhia a, huan suang akipanin dal a ki sungkhia hi.

³Mihingin khomial phaktawp a neisaka, huan khomial sah leh thukah phaktawp gamlapen tanin sik-bua a zongkhia.

⁴Mite om louhna ah kokhuk lutna hawm a tou vangua, mite apat gamla ah a kikhai ua, khatlam khatlamah a ki vei uh.

⁵Lei ahihleh, huai akipanin tanghou a hongsuaka: huan a nuaiah meia hihbangin a kilumlet hi.

⁶Huailaia suangte saphir suang mun ahi a, huan dangkaeng nen a nei hi.

⁷Huai lampi sasial ne vasain a theikei a, mu-akla mitin leng a mu ngei sam kei hi.

⁸Gamsa kisatheiten a sikkha ngeikei ua, humpinelkai lunlai leng huailaiah a paikha neikei hi.

⁹Meisah suanpi tungah a khut a koiha; a zungin mualte a lumlet a lumlet hi.

¹⁰Suangpite lakah lam a tou honga; huan a mitin thil mangpha chiteng a mu hi.

¹¹A takkhiak louhna ding un lui luangte a tuama; huan thilkisel khovak ah a honlakhia a.

¹²Himahleh ko ilaiah a pilna a kimu dia? Huan theihsiamna mun koilaia om ahia?

¹³Mihingin a lampi a theikei hi; mihing gamah leng muhin a om kei hi.

¹⁴Tui thukin, Ka kiangah a omkei, a chi a.

¹⁵Dangkaenga muh theih ahi keia, huai man dingin dangka leng buk theih ahi kei hi.

¹⁶Ophir dangkaeng toh a manphatna teh theih ahi kei ding, onik mantam hiam saphir toh hiam.

¹⁷Dangkaeng leh limlangin a kimpih theikei ua: huai khenna dingin dangkaeng hoih suangmantam leng ahi theikei ding hi.

¹⁸Suang dum hiam suang muhpaisuak theih a kigen kei ding: A hi, pilna man rubi suang sangin a sangjaw hi.

¹⁹Ethiopia topazi suangin a pha kei dia, dangkaeng tak toh leng a manphatna teh ding ahi kei.

²⁰Ahihleh pilna koi akipana hongpai ahia? Huan theihsiamna mun koia om hia?

²¹Mihing tengteng mit akipana sel ahi chih leh, huihkhua a vasate akipan sitsa a om ahi chih theiin.

²²Siatna leh sihnain, huaia thuthang ka bil un ka ja uh, a chi ua.

²³Huaia lampi Pathianin a theisiam, huai amun a thei hi.

²⁴Lei mong tanin a en ngala, huan van nuai thil tangtang a mu hi.

²⁵Huiha dinga gikna a piak lain, leh tuite tehna a a teh laiin;

²⁶Vuah adinga thupiak a bawla, vanging khophia adia lampi a bawl laiin;

²⁷Huailaiin aman a mua, a phuanga; ahih kipa, ahi, a zong khia hi.Huan mihing kiangah, Ngaiin, TOUPA kihtak, huai pilna ahi: huan hoihlou akipan pai mang theisiamna ahi, a chi hi.

²⁸Huan mihing kiangah, Ngaiin, TOUPA kihtak, huai pilna ahi: huan hoihlou akipan pai mang theisiamna ahi, a chi hi.