¹Akoi abang hileh, Job, ka honngen hi, thugen ja inla ka thugen tengteng ngaikhiain.

²Ngaiin, tuni, ka kam ka kaa, ka kamin ka pau hi.

³Ka thuten ka lungtang dikna a genkhe ding uh; huan ka mukten a theih ngei uh chihtaktakin a gen ding uhi.

⁴Pathian Khain a honbawla huan Thil bangkim hihthei huin hinna a honpai hi.

⁵Na theih leh, hondawng in; ka maah na thute a kizomzomin koihin, na panna ah ding in.

⁶Ngaiin, nang bangin Pathian lamah ka om hi: kei leng tungmana bawl ka hi.

⁷Ngaiin, ka lauhuainain nang a honlausak kei ding, ka hahkatna leng na tungah a gik kei ding hi.

⁸Chihtaktakin ka jakin na pautaa, huan na thute ging ka zata hi.

⁹Ka siang hi, tatlekna bei; ka hoiha, kei ah thulimlouhna leng a om kei, chiin:

¹⁰Ngaiin, kei demna ding a jiak a mua melmain a honsimta hi;

¹¹Ka khete kol a bunsaka, ka lampite tengteng achiamteh hi.

¹²Ngaiin, ka hondawng ding, hiai na diklouhna ah; mihing sangin lah Pathian a lianzo ngala.

¹³Bangdia amah dou na hia, Ka thute a bangmahmah lah a dawng kei ding, chiin?

¹⁴Pathianin lah khatvei a gena, ahi, nihvei, mihingin limsak kei mahleh.

¹⁵Jana mang ah, mengmuhna ah, mite tunga ihmut kip a kiak laiin, lupna tunga ihmut laite in;

¹⁶Huailaiin mite bilte a honga, vaunatein amau a hihlaua,

¹⁷Huchia a thiltup akipana mihing a lakkika, mihing a kipana kisaktheihna a satkhiak theihna dingin;

¹⁸Aman kokhuk akipan a kha a kep kik saka, namsaua kipan a hinna.

¹⁹A lupna tungah natnaa sawiin leng a om, huan a guhtea kinakna omgige tohin:

²⁰Huchiin a hinnain tanghou a kiha, huan a khain an lim.

²¹Asa a tum manga, huchiin muh theihin a om kei; huan a kimulou a guhte hongdawk khia uh.

²²A hi, a kha kokhuk kiangah a hong naia, huan a hinna hihsemite kiangah.

²³A kianga angel, kamlet, sang khat laka khat, mihing kianga amah adia dik bang ahia chih etsakding a om leh;

²⁴Huchia amah adinga chingtheia, Kokhuka pai sukna akipan amahsuaktasak un, tatna ka muta,

²⁵A sa naupanga sangin nou jaw hen; a tuailai nite lamah kik nawnta hen, chi angel.

²⁶Pathian kiangah a thuma, huan amah dingin deihsak theihin a om hi; huchiin nuamna toh a mai a mua: huan a diktatna a kiangah a pe nawn hi.

²⁷Mite maah la asa a, Ka khialta a, a dik kana hekkawia thukin ka om kei!

²⁸Kokhuk sunga paisukna akipan ka kha a tanta a, huan ka hinna vakna a muta ding hi, achia.

²⁹Ngaiin, hiai thilte tengteng Pathianin, mihing lak ah hihna, nihvei, ahi thumvei.

³⁰Kokhuk akipan a kha pi kik dingin, huchia mihing vaknaa hihvaka a om theihna dingin.

³¹Chiamteh hoihin, Aw Job, honngaikhia in: dai inla, thu ka gen ding.

³²Gending mahmah na neih leh, hon dawng in: Pau in, siam hontansak lah ka ut ngala.Na neih kei leh, kei honngaikhia in: dai inla pilna ka honsinsak ding hi.

³³Na neih kei leh, kei honngaikhia in: dai inla pilna ka honsinsak ding hi.