¹Kuapeuh salhna om naka genhak thakhatin a puakjak dinga, hih damna om louin.

²Mi diktatte a pun chiangun, mite a kipak uh: himahleh mi gillouin vaihawmna a puak chiangin, mite a thumthum uh.

³Kuapeuh pilna itin apa a kipaksaka; himahleh kuapeuh kijuakte kithuahpihin a sum a mawkzatbei hi.

⁴Kumpipan vaihawmnain gam a hihkipa: himahleh kuapeuh thilpiak phut teiteiin a hihsia hi.

⁵Mi a inveng maitangphatin kalsuante adingin len a jak sak hi.

⁶Mi hoihlou tatlekna ah thang a om: himahleh mi diktatin la a saa, a kipak hi.

⁷Mi diktatin mi genthei thu a theihpih a: mi gilouin huai thei dingin theihsiamna a neikei hi.

⁸Mi simmohhatten khopi a hal ua: himahleh mi pilten thangpaihna a heimang uh.

⁹Mi pilin mi hai a kiselpih leh, a heh hiam a nui hiam, khawlna a om kei ding hi.

¹⁰Sisan duhna dangtakin amah mi hoihkim a mudah: huan mi tang a hihleh, a hinna a zong uhi.

¹¹Mi haiin a hehna tengteng a gena: himahleh mi pilin a genkhe keia, a khemdai hi.

¹²Vaihawmiin juauthu a ngaihkhiak leh, a sikhate tengteng gilou ahi uh.

¹³Mi genthei leh nuaisiahhat a kituak khawm ua: TOUPA a nih tuak uh mitte a sukvaksak hi.

¹⁴Kumpipa ginomtaka gentheite ngaihtuah, khantawnin a mangtutphah a kip ding hi.

¹⁵Chiang leh salhnain pilna a pia: himahleh naupang amah thuthua omsakin a nu adingin zumna a omsak hi.

¹⁶Giloute a pun chiangun, tatlekna a pung hi: himahleh mi diktatin a pukna uh a en ding hi.

¹⁷Na tapa bawlhoihin, awlna a honpe ding hi; ahi, na kha adingin nuamna a honpe ding hi.

¹⁸Mengmuhna om louhna ah, miten khamna a paikhia uh: himahleh kuapeuh dan jui, aman nuam a sa hi.

¹⁹Sikha thutea bawl hoih in a om kei ding: a limsak kei ding thei mahleh.

²⁰A thutea man gang mi na mu hia? amah akipan sangin mihai akipanin lametna a omjaw hi.

²¹Kuapeuh a naupan akipana a sikha nuamtattaka kemin a tawptawpin amah tapa honghiin a nei ding hi.

²²Mi hehin kinakna a tok thoua, huan mi thangpaiin tatlekna a hau hi.

²³Mihing kisaktheihnain amah a lai naim ding: himahleh kuapeuh lungsim kiniamkhiakin zahtatna a mu ding.

²⁴Kuapeuh gutami toh kithuahin amah kha a mudah hi: nakpitaka ngetna a jaa huan bangmah a gen kei.

²⁵Mihing kihtaknain thang a hontawia: himahleh kuapeuh TOUPAa a muanna koih a bit ding hi.

²⁶Mi tampiin vaihawmmi deihsakna a zong ua: himahleh mihing vaihawmna TOUPA akipan a hongpai ahi.Mi diklou mi diktat adingin kihhuai ahi: huan kuapeuh lampia tang migilou adingin kihhuai ahi.

²⁷Mi diklou mi diktat adingin kihhuai ahi: huan kuapeuh lampia tang migilou adingin kihhuai ahi.