¹Kumpipa Lemuel thute; a nun amah ahilh thu:

²Bang ahia, ka tapa? Huan bang ahia, Aw ka sul tapa? Huan bang ahia, Aw ka thuchiam tapa?

³Na hatna numeite kiangah pe kenla, kumpipate hihsia te kiangah leng na lampite pe sam ken.

⁴Kumpipate ading ahi kei, Aw Lemuel, uain dawn kumpipate ading ahi kei; Zu khauh koia om ahia, chih leng lalte ading ahi sam kei.

⁵Huchilouin jaw a dawn un, dan a manghilh un, gimthuak kuapeuh vaihawmna a kaikawi kha ding uh.

⁶Mangthang dia mansa kiangah zu khauh pia un, khaa haksasa kiangah uain:

⁷Dawn masak unla, a gentheihna manghilh sakun, a haksatna theigige nawn kei hen.

⁸Pauttheilou a ding in na kam ka in, sukgawpa om mi huchibangte tengteng thu ah.

⁹Na kam ka inlan, diktakin vaihawm in, gentheite leh tasamte kiangah vaihawmsak in.

¹⁰Numei hoih kuan a mu dia? aman lah rubi suang tunglam pek ah a om ngala.

¹¹A pasal lungtangin amah a muanga, punna taksapna a neikei ding hi.

¹²A damsung ni tengin amah a hih hoiha, a hihse kei.

¹³Samul leh jija a zonga, a khutin kilawptakin na a sem hi.

¹⁴Sumsinmi longte bang ahia: gamla akipanin a an a hontawia.

¹⁵Jan ahih lai in leng a thou a, a inkote kiangah an a pia a, a sikhanute kiangah a sep ding uh.

¹⁶Lou a ngaihtuaha, a leia; a khuta gahtein grephhuan a bawl hi.

¹⁷Hatnain a kawng a gaka, a khutte a hatsak hi.

¹⁸A sumsitna vante a phatuam hi chih a mu a; janin a khawnvak a mit kei hi.

¹⁹A khutte muikhut ah a ngaa, huan a khutte muiah a nga hi.

²⁰Gentheite lamah a khut a jaka; ahi, tasamte lam a sawk hi.

²¹A inkote jiakin vuk a kihta keia; a inkote tengteng lah puansan- auin a kithuam ua.

²²Puanphah zehoih mantam a kibawla; a puansilh puanmalngat leh sandup ahi.

²³Kongpite ah pasal theihin a oma, gama upate laka a tut laiin.

²⁴Puan hoih puansilh a bawla, a juaka; sumsinmi kiangah kawngakte a pekhia hi.

²⁵Hatna leh zahkaina a puansilh ahi; huan hun hongtung ding a nuihsan hi.

²⁶Pilnain a kam a kaa; huan siamna dan a lei ah a om hi.

²⁷A inkote lampihoih takin a ena, huan thadahna tanghou a ne kei hi.

²⁸A tate a thou ua, huan amah nuamsa a chi uhi; a pasalin leng, amah a phata,

²⁹Tanu tampiten hoih takin a hih ua, himahleh nang jaw amaute tengteng na khup vek hi, chiin.

³⁰Deihsakna khemnain a dima, huan kilawmna bangmahlou ahi: himahleh numei TOUPA laudan siam, phatin a om ding hi.A khuta gahte amah pia un; huan kongpite ah a thilhihten amah phat hen.

³¹A khuta gahte amah pia un; huan kongpite ah a thilhihten amah phat hen.