¹Mi diktatte aw, Toupa ah nuamin lasa un: midik adingin Pathian phat a kilawm him ahi.

²Kaihgingin Toupa kiangah kipahthu gen unla; pekging gui sawm neiin amah phat in lasa un.

³Amah pahtawiin la thak sa unla; husa thupi toh siamtak in tum un.

⁴Toupa thu a dika; a thilhih tengteng muanhuai taka hih ahi ngala.

⁵Diktatna leh vaihawmna dik a it naknaka; leitung Toupa chitnain a dim hi.

⁶Toupa thuin vante siam ahi a; huaia omte tengteng leng a kama hu a siam ahi uhi.

⁷Aman tuipi tuite bangkhat koih khawm bangin a bawl khawma: tui thukpi te tuh koihkhawmna in ah te khawng a koih hoih jel hi.

⁸Leitungluah tengteng in Toupa laudan siam henla; khovela om tengteng amah lauin om uhen.

⁹Aman a gen a, a hong omta a; thu a pia a, a hong om kipta ngala.

¹⁰Toupan namchih lunggelna tuh bangmahlou in a om saka: mi chih ngaihtuahna te tuh bangmah phattuamna neilou in a siam hi.

¹¹Toupa lunggelna bel khantawnin a om kip dinga, a lungtanga ngaihtuahte khang tengteng tanin a om kip ding hi.

¹²Toupa Pathin nei nam tuh a hampha uhi; amah gouluah dia a tel mite mah.

¹³Toupan van a kipan in en a; mihing tate tengteng a mu naknak.

¹⁴Lei a om tengteng a omna mun a kipanin a hon en jel hi.

¹⁵Amaute tengteng lungtang sekpan a thilhih tengteng uh a enkhia hi.

¹⁶Kumpipa himhim sepaih tam jiak lela humbit ahi ngeikei: mihat thahat jiak lela tatkhiak ahi sam kei.

¹⁷Bitna dingin sakol bangmah ahi kei: a hat mahmah jiak lelin kuamah a humbit tuan kei ding hi.

¹⁸Ngai dih, Toupa mit tuh amah laudan siamte tungah a tu gige a, a chitna lam ente tungah.

¹⁹A hinna uh sihna laka humbit ding leh kial tun a amau tunghing dingin.

²⁰I hinna in Toupa a ngak nilouha; amah hon panpihpa leh i phaw uh ahi.

²¹Amah ah i lungtang a nuam ding ahi, a min siangthou i muan jiak in.Toupa aw, na chitna tuh ka tunguah om hen, kon lamet bang jel un.

²²Toupa aw, na chitna tuh ka tunguah om hen, kon lamet bang jel un.