¹Mwari wangu, Mwari wangu, mandisiireiko? Munomirireiko kure pakundibatsira, napamashoko okugomba kwangu?

²Mwari wangu, ndinodana masikati, asi hamupinduri; Nousiku, asi handiwani zororo.

³Asi imwi muri mutsvene, imwi mugere parumbidzo dzaIsiraeri.

⁴Madzibaba edu akavimba nemi; Vakavimba, imwi mukavarwira.

⁵Vakachema kwamuri, vakarwirwa; Vakavimba nemi, vakasanyadziswa.

⁶Asi ini ndiri honye, handizi munhu; Ndiri chinhu chinozvidzwa navanhu, chinoshorwa navanhu vose.

⁷Vose, vanondiona vanondiseka; Vanoshamisa muromo, vanodzungudza misoro, vachiti,

⁸Chizviisai kuna Jehovha; iye ngaamurwire; Ngaamurwire, zvaanomufarira iye.

⁹Asi ndimi makandibudisa pachizvaro; Makandivimbisa nemwi ndichiri pamazamu amai vangu.

¹⁰Ndakaiswa kwamuri kubva pachizvaro; imwi muri Mwari wangu kubva padumbu ramai vangu.

¹¹Regai kuva kure neni; nekuti njodzi iri pedo; nekuti hapana angabatsira.

¹²Hondo zhinji dzakandikomba; Hondo dzine simba dzaBhashani dzakandipoteredza.

¹³Dzinondishamisira miromo yadzo, Seshumba inoparadza ichiomba.

¹⁴Ndakadururwa semvura, mafupa angu ose akasvodogoka; moyo wangu wakafanana nenamo; Wakanyauka mukati moura hwangu.

¹⁵Simba rangu rakaoma sechaenga; Rurimi rwangu rwakanamatira pashaya dzangu; Makandiisa paguruva rorufu.

¹⁶Nekuti imbwa dzakandikomberedza; Ungano yavanoita zvakaipa yakandipoteredza; Vakaboora maoko angu namakumbo angu;

¹⁷Ndingaverenga mafupa angu ose; Vanonditarira nokundinananidza;

¹⁸Vanogovana nguvo dzangu pakati pavo, Vanokanda mijenya pamusoro pehanzu yangu.

¹⁹Asi imwi Jehovha, regai kuva kure neni; imwi simba rangu, kurumidzai kundibatsira.

²⁰Rwirai mweya wangu pamunondo; Mudikamwa wangu pasimba rembwa.

²¹Ndiponesei pamuromo weshumba; Zvirokwazvo, makandipindura ndiri pakati penyanga dzenyati.

²²Ndichadudzira zita renyu kuhama dzangu; Ndichakurumbidzai pakati peungano.

²³imwi munotya Jehovha, murumbidzei; imwi mose vana vaJakove, mukudzei; Mumutyei, imwi mose vana vaIsiraeri.

²⁴Nekuti haana kuzvidza kana kusema dambudziko raanotambudzwa; Kana kumuvanzira chiso chake; Asi panguva yaakachema kwaari akamunzwa.

²⁵Kurumbidza kwangu paungano huru kunobva kwamuri; Ndicharipa mhiko dzangu pamberi pavanomutya.

²⁶Vanyoro vachadya vakaguta; Vanotsvaka Jehovha ndivo vachamurumbidza; moyo yenyu ngairarame nokusingaperi.

²⁷Migumo yose yenyika icharangarira nokudzokera kuna Jehovha; Marudzi ose avahedheni achanamata kwamuri.

²⁸Nekuti ushe ndohwaJehovha; Ndiye mubati wavahedheni.

²⁹Vakuru vose venyika vachadya nokunamata; Vose vanoburukira kuguruva vachapfugama pamberi pake, Naiye asingagoni kuraramisa mweya wake.

³⁰Vana vake vachanamata kwaari; Rudzi runotevera ruchaudzwa zvaJehovha.

³¹Vachauya vachidudzira kururama kwake Kuvanhu vachazozvarwa, kuti ndiye wakazviita.