¹Haiwa Jehovha, regai kundiraira pakutsamwa kwenyu, Musandiranga nokusafara kwenyu kukuru.

²nekuti miseve yenyu yandibaya, Ruoko rwenyu runonditsikirira kwazvo.

³Hakuchina hukukutu panyama yangu nokuda kwehasha dzenyu; Uye hapachina mufaro pamafupa angu nokuda kwechivi changu.

⁴Nekuti zvakaipa zvangu zvafukidza musoro wangu; Zvinondiremera somutoro unorema.

⁵Maronda angu anonhuwa, akaora, Nokuda kohupenzi hwangu.

⁶Ndakakombamiswa, ndakakotamiswa kwazvo, Ndinofamba ndichichema zuva rose.

⁷Nekuti chiuno changu chizere nevutsva; Hakuchina hukukutu panyama yangu.

⁸Ndakati rukutu, ndavhunika kwazvo; Ndakagomera nokuda kokutambudzika komoyo wangu.

⁹Ishe, zvose zvinoda moyo wangu zviri pamberi penyu; Hamuna kuvanzirwa kugomba kwangu.

¹⁰moyo wangu unopfura, ndapererwa nesimba rangu; Kana chiri chiedza chameso angu, naicho chabva kwandiri.

¹¹Vanondida, neshamwari dzangu, vanomira kure nokuda kwehosha yangu; Uye hama dzangu dzimire kure.

¹²Vanotsvaka upenyu hwangu vanonditeyira misungo; Uye vanotsvaka kundikuvadza vanotaura zvokuparadzwa kwangu, Asi vanofunga kundinyengera zuva rose.

¹³Asi ini ndakafanana nematsi, handinzwi; Ndakafanana nembeveve isingashamisi muromo wayo.

¹⁴Zvirokwazvo, ndakafanana nomunhu asinganzwi, Asina mhinduro pamuromo wake.

¹⁵Nekuti ndimi, Jehovha, wandinotarira; imwi muchapindura, Jehovha Mwari wangu.

¹⁶Nekuti ndakati, Ngavarege kufara pamusoro pangu; Kana rutsoka rwangu ruchitedzemuka, vanozvikudza pamusoro pangu.

¹⁷Nekuti ndinovavarira kugumburwa, Uye njodzi yangu iri pamberi pangu nguva dzose.

¹⁸Nekuti ndichazvireurura zvakaipa zvangu; Ndichachema zvivi zvangu.

¹⁹Asi vavengi vangu vakasvinuka, vane simba, Uye vanondivenga ndisina mhosva vawanda.

²⁰Naivowo vanotsiva zvakaipa nezvakanaka, Ndivo vadzivisi vangu, nekuti ndinotevera chinhu chakanaka.

²¹Regai kundisiya, Jehovha; Mwari wangu, regai kuva kure neni.

²²Kurumidzai kundibatsira, Ishe, imwi muponesi wangu.