¹Usava neshungu nokuda kwavanoita zvakaipa, Usagodora vanoita zvisina kururama.

²nekuti vachakurumidza kudzurwa souswa, Vachaoma semuriwo mutema.

³Vimba naJehovha, uite zvakanaka; Gara panyika, ufunde tariro.

⁴Farikana kwazvo kuna Jehovha; Iye agokupa zvinodikamwa nomoyo wako.

⁵Isa nzira yako kuna Jehovha; Vimbawo naye, iye achazviita.

⁶Iye achabudisa kururama kwako sechiedza, Nokururamisirwa kwako samasikati.

⁷Nyarara pamberi paJehovha, umurindire unyerere; Usava neshungu pamusoro peanofara panzira yake, Pamusoro pemunhu anoita mano akaipa aakafunga.

⁸Rega kutsamwa, urashe hasha; Usava neshungu, zvinongotadzisa munhu.

⁹nekuti vanoita zvakaipa vachagurwa; Asi vanorindira Jehovha vachagara nhaka yenyika.

¹⁰Kwasara chinguva chiduku, akaipa haachazovipo; Zvirokwazvo, iwe uchacherekedza zvakanaka paaigara, asi haachazovipo zvirokwazvo iwe uchacherekedza zvakanaka paaigara, asi haachazovipo.

¹¹Asi vanyoro ndivo vachagara nhaka yenyika; Ndivo vachafarikana kwazvo norugare rukuru.

¹²Akaipa anofungira akarurama mano akaipa, Anomurumanira meno ake.

¹³Ishe achamuseka; nekuti anoona kuti zuva rake rinouya.

¹⁴Vakaipa vakavhomora munondo, vakawembura uta hwavo; Kuti vawisire pasi varombo navanoshaiwa, Kuti vauraya vakarurama panzira;

¹⁵Munondo wavo uchapinda pamoyo yavo imene, Uye uta hwavo huchavhuniwa.

¹⁶Zvishoma, zvakanaka, zvowakarurama zvinopfuura zvakawanda zvavakaipa vazhinji.

¹⁷nekuti maoko avakaipa achavhuniwa; Asi Jehovha anotsigira vakarurama.

¹⁸Jehovha anoziva mazuva avane moyo yakarurama; Nhaka yavo ndeyokusingaperi.

¹⁹Havanganyadziswi nenguva yokuipa; Pamisi yenzara vachagutiswa.

²⁰Asi vakaipa vachaparara, Uye vavengi vaJehovha vachafanana nokunaka kwamafuro; Vacharova; vacharova soutsi.

²¹Akaipa anokwereta, asingaripizve; Asi akarurama ane tsitsi, anopa.

²²nekuti vanokomborerwa naye vachagara nhaka yenyika; Asi vanotukwa naye vachaparadzwa.

²³Tsoka dzomunhu uyu unosimbiswa naJehovha; Unofarikana munzira yake.

²⁴Kunyange akawa, haangawiswi chose; nekuti Jehovha anomutsigira noruoko rwake.

²⁵Ndakanga ndiri muduku, zvino ndakwegura; Kunyange zvakadaro handina kutongoona akarurama achisiiwa, Kana vana vake vachipemha zvokudya.

²⁶Zuva rose anoramba ane tsitsi, achiposa; Vana vake vanokomborerwa.

²⁷Ibva pane zvakaipa, uite zvakanaka; Ugare zvakanaka nokusingaperi.

²⁸nekuti Jehovha unoda zvakarurama, Haasii vatsvene vake; Vanochengetwa nokusingaperi; Asi vana vowakaipa vachaparadzwa.

²⁹Vakarurama vachagara nhaka yenyika, Vachagaramo nokusingaperi.

³⁰Muromo wowakarurama unotaura zvenjere, Rurimi rwake runotaura zvakarurama.

³¹Murayiro waMwari wake uri mumoyo make; Pakutsika kwake haangatongotedzemuki.

³²Akaipa anovandira akarurama, Achitsvaka kumuuraya.

³³Jehovha haangamuregeri muruoko rwake, Kana kumupa mhosva kana atongwa.

³⁴Rindira Jehovha, urambire panzira yake, Iye achakukudza kuti ugare nhaka yenyika; Kana vakaipa vachiparadzwa iwe uchazviona.

³⁵Ndakaona akaipa anesimba guru, Achitandavara somuti munyoro panyika yawo.

³⁶Zvino mumwe akapfuurazve, wanei haachipo; Ndakamutsvaka, asi akanga asichawanikwi.

³⁷Cherekedzai munhu akakwana, mutarire akarurama; nekuti kuguma komunhu uyo rugare.

³⁸Kana vari vadariki, vachaparadzwa pamwechete; Pakuguma kwavo vakaipa vachaparadzwa.

³⁹Asi kuponeswa kwavakarurama kunobva kuna Jehovha; Ndiye nhare yavo panguva yokutambudzika.

⁴⁰Jehovha anovabatsira, nokuvarwira; Anovarwira kuna vakaipa, nokuvaponesa, nekuti vakandovanda maari.