¹Ipapo Jobho akapfuura nokutaura kwake, akati,

²NaMwari mupenyu, iye akanditorera kururama kwangu; nowaMasimbaose akatambudza mweya wangu;

³(Nokuti upenyu hwangu huchiri mandiri chose, Nomweya waMwari uchiri mumhino dzangu;)

⁴Zvirokwazvo miromo yangu haingatauri zvisakarurama, Uye rurimi rwangu harungarevi zvinonyengera.

⁵Mwari ngaandidzivise ndirege kukururamisirai; Kusvikira parufu rwangu handingarashi kusanyengera kwangu.

⁶Ndinobatisa kururama kwangu, handingakuregi; moyo wangu haungandipi mhaka ndichiri mupenyu.

⁷Muvengi wangu ngaaite sewakaipa. Uye anondimukira ngaaite seasina kururama.

⁸nekuti asingadi Mwari ane tariro yeiko, kunyange azviwanira fuma, Kana atorerwa mweya wake naMwari here?

⁹Ko Mwari achanzwa kuchema kwake, Kana achiwirwa nenjodzi here?

¹⁰Ko iye achafarira waMasimbaose, Nokudana kuna Mwari nguva dzose here?

¹¹Ini ndichakudzidzisai zvoruoko rwaMwari; Izvo zvina waMasimbaose handingazvivanzi.

¹²Tarirai imwi mose makazviona henyu; Zvino makagova vanhu vasina maturo chose neiko?

¹³Ndiwo mugove unopiwa munhu akaipa naMwari, Nemhaka yavamanikidzi, yavanopiwa nowaMasimbaose.

¹⁴Kana vana vake vachiwanda, vourawa nomunondo; Vana vake havangaguti zvokudya.

¹⁵Vana vake, vakasara, vachavigwa vafa, Chirikadzi dzake hadzingachemi.

¹⁶Kunyange akaunganidza sirivha ikaita seguruva, Nokugadzira zvokufuka zvikaita sevhu;

¹⁷Angazvigadzira hake iye, asi akarurama ndiye achazvifuka; Asine mhosva ndiye achagovera sirivha.

¹⁸Anovaka imba yake sechifusi, Sechirindo chinoitwa nomurindi.

¹⁹Anovata pasi akafuma, asi haapamhidzizve; Anosvinudza meso ake, asi haachipo.

²⁰Zvinotyisa zvinomubata semvura zhinji; dutu remhepo rinomubvuta usiku.

²¹Mhepo inobva mabvazuva inomutora ndokuenda hake; Inomutsvaira panzvimbo yake.

²²Mwari achamuposha, asingamunzwiri tsitsi, Uchatiza zvokutiza paruoko rwake.

²³Vanhu vacharova maoko pamusoro pake, Vachamuridzira muridzo abve panzvimbo yake.