¹Shure kwaizvozvo Jobho wakashamisa muromo wake, akatuka zuva rake.

²Jobho akapindura akati,

³Zuva randakaberekwa naro ngarirove, Nousiku uhwo hwavakati, Mwana womukomana agamuchirwa.

⁴Zuva iro ngarive rima; Mwari ari kumusoro ngaarege kurirangarira, Nechiedza ngachirege kurivhenekera.

⁵Rima nomumvuri worufu ngazviritore rive razvo; Gore ngarigare pamusoro paro; Zvose zvinosvibisa zuva ngazvirivhunduse.

⁶Kana huri vusiku uhwo, ngahubatwe nerima guru; Ngahurege kufara pakati pamazuva egore; Ngahurege kurahwa pakati pemwedzi.

⁷Usiku uhwo ngahuve ngomwa; inzwi romufaro ngarirege kupinda mahuri.

⁸Vanotuka zuva iro ngavavutukewo, Ivo vanogona kumutsa shato huru.

⁹Nyeredzi dzamambakwedza ahwo ngadzisvibe; Ngahumirire chiedza, asi huchishaiwe; Ngaurege kuona fungiro dzameso amangwanani;

¹⁰Zvahusina kupfiga mikova yemimba yamai vangu, Kana kuvanza kutambudzika pameso angu.

¹¹Ndakaregereiko kufa ndichiri mumimba? Ndakaregerei kuparara ndichibuda mudumbu,

¹²Mabvi akandigamuchirireiko? Kana mazamu, kuti ndimwe?

¹³nekuti ndingadai zvino ndakatandavara, ndinyerere; Ndingadai ndivete; ipapo ndingadai ndazorora;

¹⁴Pamwechete namadzimambo namakurukota enyika Vakazvivakira matongo;

¹⁵Kana namachinda, aiva nendarama, Akazadza dzimba dzawo nesirivha;

¹⁶Kana ndingadai ndisina kuvapo somwana akaponiwa nguva isina kusvika; Savacheche vasina kutongoona chiedza.

¹⁷Vakaipa vanorega kutambudza kwavo ipapo; Vakaneta vanozorora ipapo.

¹⁸Vasungwa vanorugare pamwechete ipapo; Havanzwi inzwi romutariri.

¹⁹Vaduku navakuru varipo; Uye muranda akasununguka panatenzi wake.

²⁰Munhu ari panjodzi anopirweiko chiedza, Noupenyu kuno ane shungu pamoyo;

²¹Avo vanoshuva rufu, asi haruuyi; Vanoruchera kupfuura fuma yakavanzwa pasi;

²²Vanopembera kwazvo, Nokufara, kana vachiwana hwiro?

²³Munhu, akadzimira nzira yake, anopirweiko upenyu, Iye akadzivirirwa norumhanda naMwari?

²⁴Nekuti ndinogomera ndisati ndadya, Kuvuvura kwangu kunodururwa semvura.

²⁵Nekuti chinhu chandaitya chandiwira, Nechandinoteta chandivinga.

²⁶Handina mufaro, kana kunyarara, kana kuzorora; Asi njodzi inongosiuya.