¹imwi vanakomana, inzwai kurairira kwababa venyu; Teererai, muzive njere.

²nekuti ndinokupai dzidziso yakanaka; Regai kurasha murayiro wangu.

³nekuti ini ndakanga ndiri mwanakomana kuna baba vangu, Mwana oga akadikamwa kwazvo, namai vangu;

⁴Ivo baba vakandidzidzisa, vakati kwandiri, moyo wako ngaunyatsobata mashoko angu; Chengeta mirairo yangu, urarame.

⁵Zviwanire uchenjeri, zviwanire njere; Regai kukangamwa kana kutsauka pamashoko omuromo wangu;

⁶Usahurasha, hugokuchengeta; Uhude, hugokurinda.

⁷Uchenjeri chinhu chikuru kune zvose; saka uzviwanire uchenjeri; Uzviwanire njere nezvose zvaunazvo.

⁸Uhukudze, hugokukwiridza iwe; Huchakuvigira kukudzwa, kana uchihumbundikira.

⁹Huchapa musoro wako chishongo chakanaka; Huchakuisira korona inobwinya.

¹⁰Chinzwa iwe mwanakomana wangu, ugamuchire zvandinoreva; Makore oupenyu hwako agova mazhinji.

¹¹Ndakakudzidzisa panzira youchenjeri; Ndakakufambisa pamakwara akarurama.

¹²Kana uchifamba, tsoka dzako hadzingapinganidzwi; Kana uchimhanya, haungagumburwi.

¹³Natsa kubata kurairirwa; usakuregedza; Ukuchengete, nekuti ndihwo hupenyu hwako.

¹⁴Usapinda pagwara ravakaipa, Usafamba nenzira yavakashata.

¹⁵Uinzvenge, usapinda pairi; Tsauka pairi, upfuure hako.

¹⁶nekuti havavati, kana vasingaiti zvakashata; Vanotorerwa hope dzavo, kana vasingagumbusi vamwe.

¹⁷nekuti vanodya zvokudya zvezvakaipa, Nokumwa waini yokumanikidza.

¹⁸Asi gwara ravakarurama rakaita sechiedza chamambakwedza, Chinoramba chichiwedzera kubwinya kusvikira pamasikati makuru.

¹⁹Nzira yavakaipa yakaita serima; Havazivi chingavagumbusa.

²⁰Mwanakomana wangu, teerera mashoko angu; Rerekera nzeve yako kune zvandinoreva.

²¹Urambe uchitarira, Uachengete mukati momoyo wako.

²²nekuti ndihwo hupenyu kuna vanowawana, Noukukutu bwemuviri yavo yose.

²³Chengeta moyo wako kupfuura zvose zvinofanira kurindwa; nekuti mukati mawo ndimo mune zvitubu zvoupenyu.

²⁴Bvisa kwauri nhema dzomuromo, Kutsauka kwemiromo ngakuve kure newe.

²⁵Meso ako ngaarurame pakutarira; Mafungiro ameso ako ngaatarire mberi kwako.

²⁶Gadzirira tsoka dzako gwara; Nzira dzako dzose dzive dzakasimba.

²⁷Usatsaukira kurudyi kana kuruboshwe; Rutsoka rwako urubvise pane zvakaipa.