¹Uchenjeri hwakavaka imba yahwo; Hwakaveza mbiru dzahwo nomwe;

²Hwakabaya zvipfuwo zvahwo; Hwakavhenganisa waini yahwo; Hwakagadzirawo tafura yahwo.

³Hwakatuma varandakadzi vahwo; hunodanidzira pamitunhu yeguta, huchiti,

⁴Asina mano ngaatsaukire muno; Asina njere, hunoti kwaari,

⁵Uyai mudye chingwa changu, Mumwe waini yandakavhenganisa.

⁶Regai kusasvinuka murarame; Mufambe nenzira yenjere.

⁷Munhu, anoraira mudadiri anozvitsvakira kunyadziswa; Anotuka munhu wakaipa achasvibiswa.

⁸Usaraira mudadiri, kuti arege kukuvenga; Raira munhu wakachenjera, iye achakuda.

⁹Ipa wakachenjera dzidzo, ipapo iye achawedzerwa huchenjeri; Dzidzisa wakarurama, ipapo iye achawedzerwa zivo.

¹⁰Kuvamba kouchenjeri ndiko kutya Iehovha., Kuziva Mutsvene ndidzo njere.

¹¹nekuti neni mazuva ako achaitwa mazhinji, Makore oupenyu hwako achawedzerwa.

¹²Kana wakachenjera, iwe, wakazvichenjerera hako; Kana uri mudadiri, iwe woga uchava nemhosva yazvo.

¹³Mukadzi benzi anopupira; Haana mano, haazivi chinhu.

¹⁴Anogara pamukova weimba yake, Pachigaro pamitunhu yeguta.

¹⁵Kuti adanidzire kuna vanopfuura napo, Ivo vanorurama nenzira dzavo, achiti,

¹⁶Ani naani asina mano, ngaatsaukire muno; Asine njere, mukadzi anoti kwaari,

¹⁷Mvura yabiwa inozipa, Chingwa chinodyiwa pakavanda chinonaka.

¹⁸Asi haazivi kuti vanopindamo vanofa; Kuti vakakokerwa naye vari mukati-kati meSheori.