¹Zvino Jehovha wakataura naMozisi akati,

²Taura navana vaIsiraeri, uti kwavari, Ndini Jehovha, Mwari wenyu.

³Regai kuita sezvakanga zvichiitwa panyika yeEgipita mamakanga mugere, uye regai kuita sezvinoitwa panyika yeKanani, kwandichazokuisai; musafamba netsika dzavo.

⁴Itai zvandakatonga ini, chengetai zviga zvangu, kuti mufambe mazviri; ndini Jehovha, Mwari wenyu.

⁵Naizvozvo chengetai zviga zvangu, nezvandakatonga; kana munhu akazviita uchararama nazvo; ndini Jehovha.

⁶Ngakurege kuva nomunhu unoswedera kuhama yake yomumba, kuti amufukure, ndini Jehovha.

⁷Usafukura baba vako, namai vako; ndimai vako, usavafukura.

⁸Usafukura mukadzi wababa vako; ndiko kufukura baba vako.

⁹Usafukura hanzvadzi yako, mwanasikana wababa vako, kana mwanasikana wamai vako, kana vakaberekerwa mumusha kana vakaberekerwa kumwe.

¹⁰Usafukura mwanasikana womwanakomana wako, kana mwanasikana womwanasikana wako; nekuti kufukurwa kwavo ndiko kwako.

¹¹Usafukura mwanasikana womukadzi wababa vako, wakaberekwa nababa vako, ihanzvadzi yako.

¹²Usafukura vatete vako; ihama yomumba mababa vako.

¹³Usafukura mainini vako, nekuti ihama yomumba mamai vako.

¹⁴Usafukura babamunini vako, usaswedera kumukadzi wake, ndimainini vako.

¹⁵Usafukura mukadzi womwanakomana wako, ndimukadzi womwanakomana wako; usamufukura.

¹⁶Usafukura mukadzi womunin'ina wako, ndiko kufukurwa komwanakomana wako.

¹⁷Usafukura mukadzi pamwechete nomwanasikana wake; usatora mwanasikana womwanakomana wake, kuti umufukure; ihama dzomumba; zvakashata.

¹⁸Usatora mukadzi pamwechete nomunin'ina wake, arwidzane naye, kuti umufukure pamwechete nomumwe achiri mupenyu.

¹⁹Usaswedera kumukadzi kuti umufukure, achakaipa nokuva kumwedzi kwake.

²⁰Usavata nomukadzi wowokwako panyama, kuti uzvisvibise naye.

²¹Usapa mumwe wavana vako kuti apinde mumoto kuna Moreki, uye usamhura zita raMwari wako; ndini Jehovha.

²²Usavata nomurume sezvinovatwa nomukadzi; zvinonyangadza.

²³Usavata nechipfuwo chipi nechipi kuti uzvisvibise nacho; nomukadzi ngaarege kumira pamberi pechipfuwo kuti akwirwe nacho; zvinonyangadza kwazvo.

²⁴Regai kuzvisvibisa kune chinhu chimwe chaizvozvi; nekuti vahedheni vakasvibiswa nezvinhu izvi zvose, ivo vandakadzinga pamberi penyu;

²⁵nenyika yakasvibiswa; naizvozvo ndinoirova pamusoro pezvakaipa zvayo, nyika irutse vanhu vageremo.

²⁶Naizvozvo imwi chengetai mitemo yangu nezvandakatonga, kuti murege kuita chinhu chimwe chaizvozvo zvinonyangadza; kana ari wakaberekerwa munyika yenyu, kana ari mutorwa ugere pakati penyu.

²⁷(Nokuti vanhu venyika ino, vakakutangirai, vakaita zvinhu izvi zvose zvinonyangadza, nyika ikasvibiswa;)

²⁸kuti nyika irege kukurutsaiwo, kana muchiisvibisa, sezvayakarutsa vanhu vakakutangirai.

²⁹Nekuti ani naani unoita chinhu chimwe chaizvozvi zvinonyangadza, vanhu vanozviita vachabviswa pakati porudzi rwavo.

³⁰Naizvozvo chengetai zvandakakurairai, kuti murege kuita tsika idzo dzose dzinonyangadza, dzaiitwa musati mavapo, kuti murege kuzvisvibisa nazvo; ndini Jehovha Mwari wenyu.