¹Vaihawmmi toh ne dinga na tut chiangin, na maa om amah hoih takin ngaihtuah in.

²Huan anhai mi na hih leh, na gawl ah temta koih ding na hi.

³A anlimte duh lo ken; an khemnaa dim ahi uh chih thei in.

⁴Hausa dingin kigimsak ken; nangmah pilna akipan tawp in.

⁵A om loupi tungah na mit na koih ding maw? Hauhsaknaten lah amaua dingin kha a kibawl ngal ua, vanlam juana leng muvanlai bangin.

⁶Mi sumchit neih tanghou ne ken a anlimte leng duh sam ken.

⁷Amah a kisim bangin, huchibang ahi: Ne inla dawn in, na kiangah a chi a; himahleh a lungtang nang kiangah a om kei hi.

⁸Na an nek na lo khe dinga, na thu hoihte na mansuah ding.

⁹Mi hai jakin thugen ken, na thute pilna lah muhsit ding ahi ngala.

¹⁰Tanga gamgi suan ken; pa neilou louah lut ken:

¹¹Amaute tanpa lah a hat ngala; na siatna dingin amau thu gen sak ding hi.

¹²Na lungtang hilhna lamah suk inla, na bilte theihna thute lamah.

¹³Naupang laka bawlhoihna it dah in: chiangin vo lechin leng, a si kei ding hi.

¹⁴Chiangin amah na vo dinga, huan Seol akipan a kha na suakte sak ding.

¹⁵Ka tapa, na lungtang a pil leh, ka lungtang a kipak ding, keia mahmah:

¹⁶Ahi, ka lungtangin nuam a sa ding a, na mukten thil dik a gen chiangun.

¹⁷Na lungtangin mikhialte eng kei hen; himahleh ni tumin TOUPA kihtakna ah om in:

¹⁸Kipahman lah a om taktak ngala; huchiin na lametna satkhiak ahi kei ding.

¹⁹Ja in, ka tapa pil in, huchiin lampi ah na lungtang pi in.

²⁰Uain haite lakah om ken; sa haite lakah:

²¹Zukhamhat leh anhai genthei ding uh ahi ngal a: huan ihmuthainain puansia in mi tuam ding hi.

²²Nang honsuang na pa thu ngaikhia inla, a upat chiangin na nu musit ken.

²³Thutak lei inla, juak ken; ahi, pilna leh, hilhna leh theihsiamna.

²⁴Mi diktat pa nakpi takin a kipak ding: huan kuapeuh ta pil suangiin amah akipan nuamsakna a nei ding.

²⁵Na nu leh na pa kipaksak inla, nang honsuangnu nuamsasak in.

²⁶Ka tapa, na lungtang honpia inla, na mitte ka lampite ah kipak uhen.

²⁷Kijuak lah guam thukpi ahi ngala; huan numei lamdang kokhuk kochik ahi.

²⁸Ahi, suamhatmi bangin a buka, huan mite lakah lepchiah a pungsak hi.

²⁹Tunggikna kuana nei? Lungkhamna kuan a nei? Kinaknate kuan a nei? Phunna kuan a nei? Akipatna kuan liamnate a nei? mit sannakuan a nei?

³⁰Uaina peng-opten; uain lehbulh zong dia kuanten.

³¹A san lain uain en ken, nou sunga a jia a suah lain, nemtaka a pai suk lain.

³²Atawp chiangin gulpi bangin a keia, guldekpak bangin guin a zen hi.

³³Na miten thil lamdangte a mu ding lungtangin thil hoihloute a genkhe ding hi.

³⁴Ahi, tui laia lum bang na hi dinga, ahihkeileh long khuam dawna lum bang.A honsat ua, na ka sa kei; a honvua ua, bangmahin ka vei kei; chikchiangin ka halh dia? Zong nawn-nawn veng, na chiding.

³⁵A honsat ua, na ka sa kei; a honvua ua, bangmahin ka vei kei; chikchiangin ka halh dia? Zong nawn-nawn veng, na chiding.