¹Toupa a thupi a, nakpi taka phat ding ahi, i Pathian khopi ah, a tang siangthou ah.

²A sandan a kilawm, khovel tengteng kipahna, Zion tang ahi, mallam panga. Kumpipa thupi tak khopi.

³A inpi ahte Pathian in insang a hihdan a kitheisaka.

⁴Ngaiin, kumpipate tuh a kikhawm khawm ua, a pai khawmta uhi.

⁵A mu ua, huchiin lamdang a sa ua; a mangbang ua, a paimang pah uhi.

⁶Huaiah linna in a mana; numei nauvei natna in a matlai bang in.

⁷Suahlam huih in Tarshis long liante a nahihse jel hi.

⁸Sepaihte Toupa khopi ah, i Pathian khopi ah, bila i jak bang takin i muta: Pathianin huai khopi khantawn adingin a hihkip ding. Selah.

⁹Pathian aw, na biakin sunggil ah na chitna ka ngaihtuahta uhi.

¹⁰Pathian aw, na min bang ngeiin na phatna tuh kawlmong phain a om a: na khut taklam tuh diktatna in a dim hi.

¹¹Na vaihawmnate jiakin Zion tang kipak takin om henla, Juda tanute nuamin om uhen.

¹²Zion kim ah, a kimvelin pai unla: a galven insangte leng sim un.

¹³A kulhte chiamteh hoih unla, a inpite ngaihtuah un; khangthak hong om nawnte kianga na hilh theihna ding un.Hiai Pathian khantawn khantawna i Pathian hi ding ahi ngala: sih tanpha a leng honpipa ahi ding hi.

¹⁴Hiai Pathian khantawn khantawna i Pathian hi ding ahi ngala: sih tanpha a leng honpipa ahi ding hi.