1Mwari wangu, Mwari wangu, mandisiireiko? Munomirireiko kure pakundibatsira, napamashoko okugomba kwangu?2Mwari wangu, ndinodana masikati, asi hamupinduri; Nousiku, asi handiwani zororo.3Asi imwi muri mutsvene, imwi mugere parumbidzo dzaIsiraeri.4Madzibaba edu akavimba nemi; Vakavimba, imwi mukavarwira.5Vakachema kwamuri, vakarwirwa; Vakavimba nemi, vakasanyadziswa.6Asi ini ndiri honye, handizi munhu; Ndiri chinhu chinozvidzwa navanhu, chinoshorwa navanhu vose.7Vose, vanondiona vanondiseka; Vanoshamisa muromo, vanodzungudza misoro, vachiti,8Chizviisai kuna Jehovha; iye ngaamurwire; Ngaamurwire, zvaanomufarira iye.9Asi ndimi makandibudisa pachizvaro; Makandivimbisa nemwi ndichiri pamazamu amai vangu.10Ndakaiswa kwamuri kubva pachizvaro; imwi muri Mwari wangu kubva padumbu ramai vangu.11Regai kuva kure neni; nekuti njodzi iri pedo; nekuti hapana angabatsira.12Hondo zhinji dzakandikomba; Hondo dzine simba dzaBhashani dzakandipoteredza.13Dzinondishamisira miromo yadzo, Seshumba inoparadza ichiomba.14Ndakadururwa semvura, mafupa angu ose akasvodogoka; moyo wangu wakafanana nenamo; Wakanyauka mukati moura hwangu.15Simba rangu rakaoma sechaenga; Rurimi rwangu rwakanamatira pashaya dzangu; Makandiisa paguruva rorufu.16Nekuti imbwa dzakandikomberedza; Ungano yavanoita zvakaipa yakandipoteredza; Vakaboora maoko angu namakumbo angu;17Ndingaverenga mafupa angu ose; Vanonditarira nokundinananidza;18Vanogovana nguvo dzangu pakati pavo, Vanokanda mijenya pamusoro pehanzu yangu.19Asi imwi Jehovha, regai kuva kure neni; imwi simba rangu, kurumidzai kundibatsira.20Rwirai mweya wangu pamunondo; Mudikamwa wangu pasimba rembwa.21Ndiponesei pamuromo weshumba; Zvirokwazvo, makandipindura ndiri pakati penyanga dzenyati.22Ndichadudzira zita renyu kuhama dzangu; Ndichakurumbidzai pakati peungano.23imwi munotya Jehovha, murumbidzei; imwi mose vana vaJakove, mukudzei; Mumutyei, imwi mose vana vaIsiraeri.24Nekuti haana kuzvidza kana kusema dambudziko raanotambudzwa; Kana kumuvanzira chiso chake; Asi panguva yaakachema kwaari akamunzwa.25Kurumbidza kwangu paungano huru kunobva kwamuri; Ndicharipa mhiko dzangu pamberi pavanomutya.26Vanyoro vachadya vakaguta; Vanotsvaka Jehovha ndivo vachamurumbidza; moyo yenyu ngairarame nokusingaperi.27Migumo yose yenyika icharangarira nokudzokera kuna Jehovha; Marudzi ose avahedheni achanamata kwamuri.28Nekuti ushe ndohwaJehovha; Ndiye mubati wavahedheni.29Vakuru vose venyika vachadya nokunamata; Vose vanoburukira kuguruva vachapfugama pamberi pake, Naiye asingagoni kuraramisa mweya wake.30Vana vake vachanamata kwaari; Rudzi runotevera ruchaudzwa zvaJehovha.31Vachauya vachidudzira kururama kwake Kuvanhu vachazozvarwa, kuti ndiye wakazviita.