¹Ipapo Zofari muNaamati akapindura, akati,

²Naizvozvo ndangariro dzangu dzinondipindura, Nokuda kokukurumidza kuri mandiri.

³Ndakanzwa kutuka kunondinyadza, Mweya wokunzwisisa kwangu anondipindura.

⁴Hauzivi here kuti kubva kare-kare, Kubva pakuiswa komunhu panyika,

⁵Kuti kufara kwavakaipa hakune nguva huru, Nomufaro wavasingadi Mwari kuti ndewechinguva?

⁶Kunyange kukura kwake kukakwirira kusvikira kudenga, Musoro wake ukasvikira kumakore;

⁷Kunyange zvakadaro uchaparara nokusingaperi sendove yake; Vaimuona vachati, Aripiko?

⁸Achabhururuka akaenda sokurota, akasawanikwa; Zvirokwazvo, achadzingwa sechinhu chinoonekwa usiku.

⁹Ziso raimuona haringazomuonizve; Nyangwe nenzvimbo yake haingazomuonizve.

¹⁰Vana vake vachatsvaka tsitsi kuvarombo, Maoko avo achadzosera fuma yake.

¹¹mafupa ake azere nesimba roujaya hwake, Asi achavata pasi naye paguruva.

¹²Kunyange kutadza kuchitapira mumuromo make, Kunyange akazvivanza pasi porurimi rwake;

¹³Kunyange akazvichengeta, akaramba kuzvirega, Akaramba akazvichengeta mumuromo make;

¹⁴Kunyange zvakadaro zvokudya zvake zvinoshandurwa muura hwake, Zvava nduru yemvumbi mukati make.

¹⁵Wamedza fuma, asi achairutsazve, Mwari achaibudisa mudumbu rake.

¹⁶Achasveta uturu bwemvumbi; Rurimi rwenyoka ruchamuuraya.

¹⁷Haangatariri nzizi, Nehova dzizere nouchi namafuta.

¹⁸Zvaakabatira achazvidzosazve, haangazvimedzi; Haangavi nomufaro wakaenzana nefuma yake yaakawana.

¹⁹nekuti akamanikidza nokurasha varombo; Akatora imba nesimba, asi haangaivaki.

²⁰Zvaakanga asingazivi kudzikama mukati make, Haangachengeti chinhu chimwe chaakanga achifarira.

²¹Hakune chinhu chakasara chaasina kuparadza; Saka kuguma kwake, hakungarambi kuripo.

²²Pakati pezvakawanda zvefuma yake achamanikidzwa; Ruoko rwomumwe nomumwe ari panjodzi rucharwa naye.

²³Kana achida kugutsa dumbu rake, Mwari achatuma kutsamwa kwake kukuru pamusoro pake, Achakunisa pamusoro pake, zvive zvokudya zvake.

²⁴Achatiza nhumbi yokurwa yamatare, Uta bwendarira huchamuboora.

²⁵Unoivhomora, ikabuda pamuviri wake; muromo wayo unobwinya, unobuda panduru yake; Anotya kwazvo.

²⁶Rima rose rakachengeterwa fuma yake, moto usina kupfutidzwa nomunhu uchamuparadza; Uchapedza zvakasara patende rake.

²⁷Kudenga-denga kucharatidza zvakaipa zvake, Nyika ichamumukira.

²⁸Zvakaunganidzwa mumba make zvichibva, Nhumbi dzake dzichayerera pazuva rokutsamwa kwake.

²⁹Ndiwo mugove womunhu akaipa waanopiwa naMwari, Nenhaka yaakatemerwa naMwari.